A Xunta de Goberno aproba a contratación de tres obras que foran rescindidas “pola desidia do anterior equipo de goberno que non puxo os terreos a disposición das empresas”

Unhas 300 obras de entidades e asociacións de veciños de toda a provincia poderán acollerse ó Plan de Cooperación con Comunidades Veciñais de 2008, ó que se destinan 2,2 millóns de euros. Estas son as estimacións feitas polo Delegado da Área de Cooperación cos Concellos e voceiro do grupo provincial socialista, Antonio Gato, na rolda de prensa posterior á Xunta de Goberno. Unha das principais novidades deste ano é que todas as obras deberán estar xustificadas en marzo de 2009, segundo establecen as bases da convocatoria publicadas no Boletín Oficial da Provincia do 28 de xullo, e que poden consultarse na páxina web da Deputación. “Nestas bases fíxanse prazos moi acotados e esíxese efectividade para evitar o que pasaba todos os anos, como agora, que aínda estamos a pagar obras correspondentes a 2005”, dixo Gato Soengas. Segundo destacou o voceiro socialista, a data límite para presentar as solicitudes é o 15 de outubro. “As entidades e asociacións veciñais terán que darse prisa para elaborar as memorias xustificativas e, ó mesmo tempo, achegar á Deputación toda a documentación necesaria”, apuntou o voceiro socialista que tamén subliñou que as obras deberán estar rematadas o 31 de decembro deste ano. “Ademais, o prazo para a xustificación do investimento acúrtase a tres meses. Queremos que as entidades asociativas e as asociación de veciños saiban que agora hai rigor e datas límite que hai que observar porque senón corren o risco de perder a subvención. Pedimos dilixencia para que non teñamos que aboar estas subvencións en 2010 ou 2012 como está sucedendo agora”. Antonio Gato temén dixo que “queremos que sexa un Plan eficiente e eficaz e que cando os funcionarios vaian a comprobar a obra, esta poida verse fisicamente e non como ocurre agora que, nalgúns casos, isto é moi difícil”. Acordos Xunta de Goberno A Xunta de Goberno aprobou este venres, precisamente, 7 contas xustificativas de obras correspondentes ós Plans de Cooperación con Comunidades Veciñais dos anos 2006 e 2007. En total, os proxectos suman 78.438 euros, dos que a Deputación achega 44.876. As obras son de comunidades pertencentes ós Concellos de Chantada, A Fonsagrada, Láncara, Monforte de Lemos, Pedrafita do Cebreiro, Riotorto e Sober. Ademais aprobouse a contratación de tres obras correspondentes ó POS 2005. Nos tres casos, os proxectos xa foran adxudicados pero tiñeron que ser rescindidos porque a Deputación non puxo os terreos a disposición das empresas no prazo legalmente previsto. Esta resolución dos contratos, realizada a petición das construtoras, supuxo ó organismo provincial o pagamento dunha indemnización do 2% do prezo de adxudicación. “Agora hai un quebranto económico provocado pola desidia do anterior equipo de goberno que non foi quen de xestionar axeitadamente para poñer os terreos a disposición das empresas. Esto supuxo un perxuizo grave así como un retraso na execución das obras”. Os proxectos volven sacarse a contratación co prezo previsto inicialmente. Entre os tres suman 435.961 euros. Tamén se deu o visto e prace ó plan de seguridade e saúde do proxecto de cuberta para o campo de fútbol de Castro Riberas de Lea así como os acordos acadados no expedente expropatorio da obra do POS 2006 de ancheamento e mellora do treito comprendido entre os puntos quilométricos 19,300 e 20,500 da estrada Chantada- Antas de Ulla.