O Presidente da Deputación e os Alcaldes asinarán o vindeiro xoves o convenio do Fondo Extraordinario
![](/sites/deputacionlugo.org/files/Imagenes/0_3908_1.jpg)
Gato Soengas anunciou que a Deputación propoñerá ós Concellos un convenio para mellorar a xestión catastral O Presidente da Deputación, José Ramón Gómez Besteiro, e os Alcaldes e Alcaldesas asinarán o vindeiro xoves o convenio do Fondo Extraordinario do organismo provincial que complementa ó Fondo Estatal de Investimento Local, segundo anunciou este venres o Deputado da Área de Cooperación cos Concellos, Antonio Gato. Haberá dúas quendas: os rexedores de 33 Concellos, seguindo a orde alfabética, asinarán o convenio ás 10 da mañá, e resto ás 13:00 horas. Gato Soengas destacou este venres que a Deputación, por iniciativa do Presidente, fai un importante esforzo inversor, de preto de 1,5 miilóns de euros, para que todos os Concellos da provincia poidan presentar en tempo e forma os proxectos e non se perda nin un só euro. O Deputado lembrou que o organismo provincial aporta o 4% para a redacción dos proxectos técnicos. Segundo os datos aportados polo responsable da Área de Cooperación cos Concellos, ata hoxe,19 Entidades Locais presentaron 70 proxectos por un valor de 13.202.985 euros. Este é un nivel baixo, porque tan só quedan 8 días de prazo, polo que desde a Deputación facemos un novo chamamento para que axilicen todo o proceso. Sería lamentable que estes fondos non foran aproveitados na súa totalidade. Mellora xestión catastral Por outra banda, o Deputado da Área de Cooperación cos Concellos anunciou que a Deputación vén de propoñer ós 45 Concellos adscritos ó novo Sistema de Recadación provincial un convenio para a mellora da xestión catastral. Os rexedores xa recibiron nunha comunicación na que plantexamos a posibilidade de que a Deputación convoque un concurso para adxudicar a unha ou dúas empresas esta xestión con fin de reducir costes e mellorar a eficacia na conformación dos padróns. Gato Soengas sinalou que deste xeito, poderán incluirse nos padróns moitos dos bens inmobles que hai nos distintos Concellos que están sen rexistrar, e de aí derivarase un novo ingreso para os municipios. Seguridade edificios da Deputación Gato Soengas fixo estes anuncios na rolda de prensa posterior á Xunta de Goberno deste venres na que se adxudicou definitivamente o servizo de vixiancia e control de edificios dependentes da Deputación. O voceiro do grupo socialista dixo que o organismo provincial incrementará o servizo de vixilancia e control en edificios e dependencias da institución para garantir a seguridade tanto dos inmobles como do material que albergan. O servizo, adxudicado ó grupo CETSA por 825.996 euros, inclúe importantes novidades como a implantación por primeira vez de sistemas de vídeovixilancia, a inclusión do edificio do Fogar de Santa María e o control dos acceso das visitas. Ademais, incrementarase nun 53% o número de vixilantes, que pasará de 15 a 23. O goberno provincial tamén acordou a adxudicación provisional de 4 novos vehículos para o Parque Movil da Deputación: un camión gravilleiro e caixa basculante, unha máquina motoniveladora, unha cisterna de emulsión asfáltica e un semi-remolque tipo bañeira. As catro adxudicacións suman un total de 457.763 euros. Por outra banda, apróbanse os pregos para a contratación dos servizos de asistencia técnica para a xestión e seguemento das actuacións previstas no proxecto europeo Lug02. O prezo previsto é de 237.800 euros. O LugO2 é unha ambiciosa iniciativa pola que se investirán 5 millóns de euros na posta en valor dos recursos mediomabientais, sociais e económicos dos Concellos incluídos nos espazos naturais protexidos, que representan o 55% do territorio da nosa provincia.