A Deputación apoia ás familias de Preescolar na Casa e insta á Xunta a non desmantelar outro programa máis
O Pleno da Deputación acordou por unanimidade instar á Xunta de Galicia responsable desta competencia- a manter as axudas que concede anualmente a Preescolar na Casa para garantir a súa continuidade, xa que constitúe un servizo imprescindible na educación no rural e contribúe a fixar poboación na provincia. Do labor educativo de Preescolar na Casa, creado en 1977, benefícianse 1.200 familias luguesas e preto de 4.000 en toda Galicia. Con tal magnitude e co obxectivo de que os núcleos de poboación nos que se imparte non queden privados deste servizo, a Deputación quixo manifestar publicamente o seu apoio e reclamar á Xunta que non desmantele outro servizo educativo-social máis. O voceiro provincial socialista, Manuel Martínez, destacou que non entendemos como unha administración pode reducir un programa polo que pasan tantos e que contribúe a dinamizar o rural en case o 50%. O certo é que a Xunta desmantela os servizos sociais, suprimen a gratuidade dos libros de texto e as axudas para comedores, os profesores substitúenos cando queren e como queren... Isto é unha realidade, non é demagoxia. Iso sí, sen embargo, o Executivo galego sí que ten 400.000 euros para retransmitir as Misas pola televisión autonómica.
A finalidade desta proposta de goberno, iniciada polo Partido Socialista, é conseguir que a Xunta non suprima os 300.000 euros necesarios para o seu funcionamento xa que, se abandona tamén este programa, obrigaría a Preescolar a realizar un ERE que afectará ós 43 profesionais dos que dispón; a metade das familias -510- quedarían sen servizo educativo; e empeoraría o despoboamento demográfico no rural.
Tal e como subliñou Martínez, o apoio a este programa exemplar en toda Europa, segundo se puxo de relevo nun encontro celebrado en Praga, confirma o compromiso anunciado polo Presidente da Deputación na toma de investidura: apoiar medidas e iniciativas que axuden a mellorar a situación demográfica da provincia. Na provincia, Preescolar na Casa esténdese en 12 áreas -6 na zona Norte e 6 na Sur- onde moitos mestres desenvolven unha actividade vital para o asentamento da poboación no rural.
Recoñecemento oficial dos Camiños de Inverno e Norte
A Deputación, tendo en conta que a actividade turística xoga un papel determinante na dinamización económica de Galicia e do conxunto das comarcas que conforman a unidade política e administrativa da provincia, acordou tamén por unanimidade solicitar á Xunta o recoñecemento oficial dos Camiños de Inverno e do Mar como rotas Xacobeas. Un factor determinante no impulso turístico está vinculado ós diferentes camiños que ó longo e ancho da xeografía serven de lugar de tránsito ós diferentes viaxeiros que teñen como destino Santiago de Compostela. A día de hoxe os dous camiños, seguen a agardar o recoñecemento oficial por parte do Executivo Galego a pesar das peticións rexistradas por distintos colectivos da provincia.
Arranca o Campus 2015
O Pleno tamén deu o visto e prace á adxudicación definitiva da expropiación da parcela número catro do Campus de Lugo, incluída no proxecto de ampliación deseñado pola Universidade de Santiago de Compostela e cofinanciado polo organismo provincial con 7 millóns de euros. Trátase do terreo comprendido entre a Avenida Pardo Iglesias e a rúa das Pedreiras, de 11.756 metros cadrados. Nesta zona situarase un centro de investigación do Campus, no que se levarán a cabo accións de desenvolvemento e investigación empresarial, así como a Escola de Enxeñería Civil cuxas obras xa foron contratadas polo organismo provincial e teñen un valor de 3.840.000 euros.
Este é o primeiro paso para o desenvolvemento do Campus 2015 no que o organismo provincial inviste 890.000 euros. Logo desta fase expropiatoria, actuará nas outras dúas zonas previstas: a comprendida entre a Avenida Bernardino Pardo Ouro e a Avenida Pardo Iglesias, de 13.693 metros cadrados, que se adicará ó sector servizos; e a rúa das Pedreiras e a nova rotonda de 11.772 m2, onde se construirá un polideportivo. En total, investiranse 4,6 millóns de euros para expropiar as zonas citadas anteriormente, que suman 37.000 metros cadrados.
Pagos de facturas máis rápidos
No Pleno tamén se deu conta do primeiro informe realizado polo Servizo de Intervención sobre a tramitación do pago de facturas a proveedores cos que traballa a Deputación. Esta medida inclúese dentro do novo sistema posto en marcha no mes marzo en cumprimento da Lei Contra a Morosidade nas Operacións Comerciais de 5 de xullo de 2010. O Rexistro de Facturas garante unha maior transparencia, eficacia e rapidez na xestión. É dicir, simplifica o proceso: as facturas envíanse ó servizo correspondente -eliminando o Rexistro Interno da institución- que recoñece a obriga e aproba o seu pago a Intervención, o que permite que os proveedores cobren en tempo e forma o importe das facturas polos servizos prestados a esta institución. Ademais, centraliza as facturas, ó incorporalas a un sistema, e posibilita consultar en calquera momento o seu estado de tramitación.
Na actualidade, as de Coruña e Lugo son as Deputación galegas que pagan con maior axilidade ós seus proveedores. No caso da luguesa pasouse de pagar nun prazo de 88 días preto de tres meses- en outubro de 2008, a unha media de 33-35 días en 2011, anticipándose incluso ós prazos fixados pola lei que obriga a que as administracións teñen que pagar ós proveedores en 50 días. Polo que respecta ás outras institucións provinciais galegas, os prazos para efectuar os pagamentos son os seguintes: Coruña 32 días, Pontevedra 60 -2 meses- e Ourense 120 días -4 meses-.
