Máis de 500 persoas participaron nos 74 obradoiros que desenvolveu o Centro de Artesanía e Deseño este ano
Máis de 500 persoas participaron na programación do Centro de Artesanía e Deseño da Deputación para o ano 2011. Foron 74 actividades formativas, que sumaron máis de 4.100 horas de formación efectiva e que supuxeron un incremento dun 10% en oferta formativa con respecto ó ano pasado. Esta programación rematou o pasado venres, coa derradeira xornada do curso Os murais e o torno, impartido polo artesán ferrolán Francisco Pérez Porto, que dende o pasado 19 de setembro reuniu nos pavillóns do CENTRAD a 10 alumnos que aprenderon diferentes técnicas de representación gráfica, de amasado e modelado e de procesos de cocción de obxectos de cerámica.
Nos 74 obradoiros que se celebraron ó longo deste ano houbo ofertas da máis variada índole: 25 obradoiros de cestaría, 12 de xoiería, 7 de téxtil, 6 de cerámica, 5 de coiro, 7 de artes do libro, 2 de madeira, 3 de vidro; e como novidades, 2 obradoiros de fotografía, 2 de pedra, 1 de tapizaría e 2 de deseño, nos que se impartiron técnicas de presentación e empaquetado de produtos. Hai que destacar a calidade dos formadores: recoñecidos profesionais procedentes de Galicia, maioritariamente lucenses, Cataluña, Madrid e Alemaña foron os encargados de compartir cos participantes os seus coñecementos.
En total ofertáronse 570 prazas, un 5% máis que o ano pasado, para as que se recibiron máis de 1.200 solicitudes. Foi especialmente destacada a demanda dos cursos de cestaría, xoiería e os de fotografía. A esta demanda contribuíu o feito de que, por primeira vez, e grazas ó Innova-TE, o programa tecnolóxico da Deputación que logrará a implantación da Administración Electrónica na provincia en menos dun ano, os interesados puideron facer a súa inscrición mediante Internet, a través da páxina web do Centro.
Outra das razóns que explican este éxito é que o CENTRAD desprazou parte das súas accións formativas a diferentes puntos da provincia. Entre os meses de marzo e xuño tivo lugar unha acción formativa de olería nas instalacións dun obradoiro da localidade de Bonxe. Tamén o Concello de Cervo foi o escenario de dous cursos, dirixidos a profesionais, de técnicas de cosido manual e de técnicas decorativas de de cor aplicadas a este material. Non foron estes os únicos obradoiros dirixidos a profesionais: 7 accións formativas solicitadas por máis de 60 solicitudes dan boa mostra da aceptación que entre os artesáns teñen as accións formativas organizadas pola Deputación.