A Deputación impulsa a Semana Santa lucense coa sinatura dun convenio coa Xunta de Confrarías
O Presidente da Deputación, José Ramón Gómez Besteiro, máis o Coordinador Xeral da Xunta de Confrarías, Ramón Basanta, acompañados por representantes de todas elas, asinaron este luns un convenio de colaboración para o impulso da Semana Santa lucense, na que están implicadas directamente 3.000 persoas. O convenio responde a varios motivos: relixiosos, económicos, a proxección turística e a posta en valor do traballo realizado polas Confrarías. A Deputación achega 8.000 euros, que sufragarán parte dos gastos derivados da promoción e organización dos diferentes actos dunha Semana Santa que cada ano está máis preto de acadar a declaración de Festa de Interese Turístico Galego.
O organismo provincial colabora así coa Xunta de Confrarías que engloba a seis irmandades da capital lucense: A Borriquita, Virxe da Esperanza, Desencravo do Señor e dos Maiores Dolores de María Santísima, Bo Xesús e do Nazareno, Santo Cristo do Perdón e Nosa Señora da Piedade, Sacramental e Entrada Triunfal de Xesús en Xerusalén. Ramón Basanta quixo agradecer a sensibilidade e recoñecemento que sentimos todos nós con este convenio, xa que a Deputación sempre se mostra aberta ó noso colectivo.
Gómez Besteiro destacou a popularidade que ano tras ano está a gañar a Semana Santa lucense, polo que felicitou ás Confrarías polo seu traballo impagable. Ademais explicou que, neste momento de austeridade para todos é difícil seguir apoiando iniciativas pero, a Semana Santa lucense, á marxe do significado para os católicos, é unha oportunidade económica e turística para a cidade de primeira magnitude.
O responsable provincial - nomeado o pasado ano Cofrade de Honra da Virxe da Esperanza- subliñou que ademais o recén acondicionamento da Catedral, impulsado polo anterior goberno de España, supón un atractivo engadido nesta convocatoria, que se suma ó feito de ser a cidade do Santísimo Sacramento. Gómez Besteiro lembrou que durante o ano pasado a Oficina Municipal de Turismo rexistrou 1.514 solicitudes de información na Semana Santa, rexistrando unha ocupación hoteleira superior ó 80%, a pesares de ser unha semana marcada polas choivas, o que obrigou a suspender algunha das principais procesións.
Nova colaboración coas Confrarías da provincia
A de Lugo non é a única Semana Santa coa que colabora a institución luguesa. A Deputación de Lugo renovou o pasado febreiro a súa colaboración co Concello de Viveiro e coa Xunta de Confrarías da localidade mariñana, co obxectivo de impulsar aínda máis esta celebración e acadar a declaración como Festa de Interese Turístico Internacional dunha Semana Santa que figura entre as máis importantes de Galicia.
A achega da Deputación estará destinada á instalación e mantemento da carpa-museo que se vén colocando dende hai 5 anos para acoller todos os pasos da Semana Santa, que o pasado ano concentraron uns 12.000 visitantes.