Regina Polín inaugura no CENTRAD unha mostra das obras máis representativas de Labajjo Grandío
![](/sites/deputacionlugo.org/files/Imagenes/0_7184_1.jpg)
A Deputada de Deseño e Artesanía, Regina Polín, acompañada polo pintor lucense Alfredo Labajjo Grandío e o artista Paco Pestana, que nesta ocasión actúa coma comisario da exposición, inaugurou hoxe unha mostra retrospectiva que recolle algunha das obras de máis sona deste artista e que poderá ser visitada ata finais de novembro na Sala de Exposicións do CENTRAD. Labajjo Grandío reúne 19 das obras máis representativas do particular estilo do pintor lucense.
Durante a súa intervención, Polín destacou que se sente moi orgullosa da importancia que está adquirindo a Sala de Exposicións do Centro, que é capaz de ofrecer un oco a todo tipo de mostras de nivel. Esta sala ten acollido exhibicións de artesanía, de fotografía, e coas obras de Labajjo Grandío eleva máis aínda a categoría deste espazo.
Pola súa banda, tanto o pintor, coma o comisario da mostra, quixeron agradecer á Deputación o trato recibido e o bo criterio amosado á hora de ofrecer un espazo expositivo perfecto para o número e características das obras presentes, así como a consideración e coidado profesional co que se tratou en todo momento ás pinturas de Labajjo.
Pestana falou da orixinalidade a brochazo limpo de Labajjo, próxima ó expresionismo e influenciada por artistas coma Laxeiro, ó tempo que o definiu coma o último dos bohemios. Así mesmo, destacou a presenza da cor, pouco habitual nos pintores galegos, xunto á técnica a brochazo limpo, coa que retrata figuras recorrentes nas súas obras. Mulleres, cans, cabalos e a anecdótica presenza de dúas tauromaquias, completan este percorrido polo máis destacado de Labajjo Grandío.
Dende 1973
O lucense Labajjo Grandío comeza a expoñer no ano 1973 e son numerosas as ocasións en que a súa obra ten sido exhibida na cidade que o viu nacer. Sempre o fixo da man de grandes nomes da cultura galega, coma Ánxel Fole, Uxío Novoneyra, Celso Emilio Ferreiro, Antón Fraguas ou Trapero Pardo, que foron algúns dos escritores que o acompañaron nas presentacións das súas exposicións. A súa obra amosa a influencia das súas viaxes, que o levaron a percorrer Europa, pero sempre sen esquecer as súas orixes. O costumismo cheo de vivas cores e de trazo groso desprende a súa visión bohemia e alegre da existencia, marcada polo simbolismo e a mitoloxía.
Días e horarios de apertura
A mostra estará aberta dende mañá ata finais de novembro, no horario habitual do Centro de Artesanía: entre as 10:00 e as 14:00 horas, de luns a venres. A entrada é totalmente gratuíta.