Lara Méndez presenta en FITUR a 1º Plataforma de Comercio Electrónico de Lugo
Méndez aproveitou o acto, promovido pola Asociación Provincial de Empresarios de Hostalería de Lugo (APEHL), para difundir unha iniciativa económica da Deputación que precisamente reforza a labor de difusión dos recursos turísticos e gastronómicos que persegue a guía dos hostaleiros. Trátase da plataforma de comercio electrónico www.losproductosdelugo.com, a única das súas características en Galicia, pois ofrece en exclusiva produtos e servizos da provincia, e as empresas adheridas non teñen que asumir ningún custe.
O portal de e-comercio experimenta un continuo crecemento dende que o organismo lugués o creou en 2011 grazas á financiación dos fondos que soubo captar da Unión Europea. Deste xeito, no último ano triplicou a súa oferta, e hoxe conta xa con 80 empresas de toda a provincia, que comercializan uns 400 produtos e servizos.
Na comarca mariñana, están adheridas na actualidade ó portal 26 empresas, pertencentes ó sector agroalimentario, artesán, xoieiro e hostaleiro, e radicadas nos Concellos de Ribadeo, Viveiro, A Pontenova, Burela, Alfoz, O Valadouro, Foz, Barreiros, Lourenzá e Cervo.
Ademais, hai outras 26 firmas da Mariña que están ultimando os trámites para pasar a formar parte desta iniciativa económica, de xeito que nas vindeiras semanas, serán máis de 50 empresas radicadas na Costa de Lugo as que comercialicen os seus produtos e servizos a través da plataforma de e-comercio da Deputación.
Novo impulso coa estrea da liña de venda de produtos en frío
O continuo crecemento que experimenta a plataforma dende a súa creación recibirá un novo impulso ó incorporarse agora a posibilidade de comercializar produtos en frío, pois máis empresas se poderán beneficiar do proxecto.
A Deputación de Lugo creou en 2011 co financiamento da Unión Europea este primeiro centro comercial virtual da provincia co fin de impulsar por medio das novas tecnoloxías o desenvolvemento económico de Lugo. O portal de venda on line forma parte da aposta decidida do organismo provincial polas PEMES e autónomos, a verdadeira columna vertebral da economía lucense, pois ábrelles unha nova canle de venda dos seus produtos e servizos, o que lles axuda a subir o volume de beneficios, ser máis competitivos e manter ou xerar postos de traballo, destacou o Presidente, José Ramón Gómez Besteiro. Ademais, ofrece por vez primeira unha imaxe de marca dos produtos de Lugo de cara ó exterior, independentemente do provedor que os ofreza.
Tras case dous anos de funcionamento, www.losproductosdelugo.com conta hoxe con 80 empresas adheridas, dos sectores agroalimentario, hostaleiro, artesán, téxtil e de lecer, entre outros. Os produtos en frío comercializados ata o de agora son queixos, capóns e pasteis.
Madrid, Málaga, a propia provincia de Lugo, A Coruña e Cádiz son os principais destinos dos pedidos rexistrados na web de e-comercio, sendo os embutidos, verduras en conserva e viño os produtos máis vendidos. Ata o de agora, vendéronse a través do portal máis de 2.000 produtos e servizos.
Das máis de 54.000 visitas que recibiu a web, a metade son de Galicia, aínda que destaca o interese que suscita a iniciativa en Madrid, con un 21% das entradas, Cataluña e Valencia. Fóra de España, a páxina rexistra consultas de ata 70 países, con Arxentina á cabeza do ránking, seguido de México ou Colombia.
Como sumarse
A Vicepresidenta animou ás PEMES e autónomos da provincia a sumarse a este escaparate internacional, lembrando que a capacidade da plataforma é ilimitada. Poden sumarse cantas empresas queiran, de forma totalmente gratuíta, recalcou. Para informarse ou facela solicitude de adhesión poden chamar ós números de teléfono 982-26-00-77/982-26-00-74 ou enviar un correo electrónico a ecomercioinnovate@deputacionlugo.org A Deputación ofrece ás firmas asesoramento personalizado e continuo para adherirse e manterse na plataforma.
Compra sinxela, rápida e segura
Os usuarios poden acceder á plataforma entrando na dirección www.losproductosdelugo.com onde se atopan cun catálogo de produtos de alimentación, artesanía, moda, servizos de lecer, óptica, entre outros. O mecanismo para comprar é rápido e sinxelo: teñen que elixir os produtos desexados, incorporalos á cesta da compra pulsando sobre a imaxe do carriño da compra e tramitar o pedido, elixindo a forma de pago. Todas as transaccións se efectúan mediante unha conexión totalmente segura que garante a privacidade dos datos do comprador. Os usuarios teñen a posibilidade de rexistrarse como clientes, o que lles permitirá facer dun xeito máis sinxelo as futuras compras.
O comprador consulta un único catálogo de produtos, realiza un único pago e recibe unha única entrega dos mesmos, o que constitúe un modelo innovador no mercado on line. Na actualidade só se poden facer envíos nacionais, pero proximamente tamén poderán ser internacionais. O cliente, que non está obrigado a facer un pedido mínimo, recibirá o material adquirido nun mínimo de 48 horas, tendo a posibilidade de coñecer en calquera momento a situación dun pedido en curso ou consultar os realizados anteriormente. No caso de non quedar satisfeito, pode devolver calquera artigo nun prazo de 15 días hábiles dende a data de recepción.
Na plataforma figura completa información sobre os produtos á venda prezo, características e unha fotografía-, pero tamén das empresas provedoras, pois inclúese unha ficha de cada unha na que figura a súa páxina web, localización en Google Map e oferta de todos os seus produtos. Os prezos dos artigos á venda son iguais ou menores que na rúa e ofrecerase a posibilidade de obter códigos de desconto. As empresas que acadaron a marca Lugo Sabe creada pola Deputación para poñer en valor os produtos autóctonos contan cun acceso directo dentro do portal web. Tamén hai un apartado específico cos produtos máis vendidos e outro de ofertas, xunto a unha sección con noticias sobre a propia plataforma e un blog.
Atención continua a clientes e empresas
A Deputación ofrece un servizo de atención ós clientes da plataforma de comercio electrónico, a través do número de teléfono 982.26.00.77 e a dirección de correo electrónico soporte@losproductosdelugo.com
EMPRESAS MARIÑANAS ADHERIDAS A DÍA DE HOXE Ó PORTAL.
Ribadeo: Alve Devesa; Casa Horta Valego; Casa Benito; Fogar do Marinero; Parador e restaurante San Miguel
Viveiro: Regal Cerámica; Hotel Augadoce Louzao; Hotel Boavista; Restaurante O Asador; Taberna do Tronco e Casa do Batán.
Barreiros: casa rural Os Tres Eixos; camping A Gaivota; Casa Elena; Finca Espiñeira
Foz: Casa da Roxa e Hotel do Sixto
O Valadouro: Mel do Trobo e Embutidos Hermelino.
Burela: Comermarisco.com
Lourenzá: Xoias do Val
Cervo: Hotel O Castelo (San Cibrao) e Casa do Mudo.
Alfoz: Hotel Casa Franco
A Pontenova: Casa do Fidalgo
