Éxito do plan de emprego da Deputación Fórmate en Verde, con máis de 500 persoas inscritas en tan só un día
Máis de 500 persoas inscribíronse en tan só un día no plan Fórmate en Verde, o que pon de manifesto o éxito deste novo plan de emprego da Deputación de Lugo, co que dará formación e asesoramento técnico, totalmente gratuítos, ós veciños da provincia para que creen ou reconvertan empresas vinculadas á produción ecolóxica e sostible. Con este programa, financiado nun 80% pola Unión Europea, o organismo provincial xerará emprego e fixará poboación no rural. A agricultura ecolóxica e a xestión forestal sostible son as actividades que están a ter polo momento maior demanda (con máis de 200 inscritos cada unha), seguidas da gandería ecolóxica (con preto de 70).
A inscrición, aberta onte, manterase ata que se cubran as prazas dispoñibles, un mínimo de 900. Para anotarse, as persoas interesadas deben entrar na páxina web www.deputacionlugo.org escoller a actividade na que queren formarse, cubrir o formulario de inscrición correspondente e envialo directamente dende a propia web. Cada persoa só pode anotarse nun sector. Os cursos comezarán o vindeiro mes de marzo, de maneira progresiva, a medida que se vaian cubrindo as prazas dispoñibles do programa. Os participantes recibirán formación, prácticas reais nunha explotación consolidada e asesoramento técnico especializado para crear, reconverter ou diversificar a súa empresa.
Información na Facultade de Veterinaria
De xeito paralelo, ó longo do que resta deste mes de febreiro e do de marzo, a Deputación levará por toda a provincia xornadas e talleres para informar de primeira man ós veciños sobre o plan Fórmate en Verde. Deste xeito, pretende facilitar o acceso á información acerca deste proxecto, e que se beneficien del o máximo número de persoas. Hoxe, tiveron lugar encontros informativos na facultade de Veterinaria de Lugo, e nos Concellos de Guntín e Chantada. Mañá, haberá xornadas en Burela e Muras; o día 28, en Lugo e Viveiro; o 1 de marzo, en Monterroso; o día 4 de marzo, na Fonsagrada; o 5, en Guitiriz e O Corgo; o 6, en Carballedo e Pol; o 7, en Castroverde; o 8, en Friol; o 12 de marzo, en Sarria; e o 27, en Castro de Rei. Tamén se ofrecerá información nas feiras MOEXMU de Muimenta; na Feira Degustación da Tenreira Galega de Láncara; na Feira do Ano de Paradela; na Festa da Primavera do Páramo, ou no Concurso Nacional de Rubia Galega do Corgo.
Desta oportunidade de futuro poden beneficiarse desempregados, emprendedores, mozos, agricultores, gandeiros e estudantes de toda a provincia, excepto os censados no Concello de Lugo, pois son destinatarios doutros programas europeos.
Por toda a provincia
A Deputación descentralizou as accións formativas en función do peso específico de cada rama obxecto do programa nas comarcas lucenses. Deste xeito, a vinculada á xestión forestal impartirase na Mariña, unha zona que concentra o 30% das empresas lucenses dedicadas ó sector da madeira.
Seguindo este mesmo criterio, as actuacións vinculadas á gandería ecolóxica terán lugar na zona centro da provincia, dado o importante número de explotacións de carne ou leite coas que contan os concellos das comarcas de Lugo, Terra Chá e A Fonsagrada. Cada municipio conta con entre 400 e 1.000 explotacións. O centro de referencia da formación será a Granxa Gayoso Castro.
Polo que respecta á agricultura ecolóxica, as accións desenvolveranse na Zona Sur, tendo en conta que nas comarcas de Chantada ou Lemos a superficie dedicada ó cultivo é de entre o 30 e o 50%, e que Monforte alberga a sede do Consello Regulador de Agricultura Ecolóxica de Galicia (CRAEGA). Neste caso, o Pazo de Tor será o centro de referencia.
Formación, práctica e asesoramento
O plan de emprego Fórmate en Verte, con un ano de duración, ten tres eixos:
- Formación: que poderá ser presencial, a distancia ou mixta, e impartirase entre os meses de marzo e outubro.
- Visitas prácticas a empresas xa consolidadas dos sectores agropecuario e forestal.
- E, posteriormente, asesoramento técnico especializado a tódolos participantes para crear empresas no rural vinculadas ós sectores gandeiro, agrícola e forestal. As persoas que queiran reconverter a súa explotación, diversificar a súa actividade ou ben poñer en marcha unha nova empresa, contarán con asesoramento continuo e especializado, dende a mesma concepción da idea, ata a súa saída ó mercado. Terán ademais á súa disposición unha canle de comercialización: a plataforma de comercio electrónico www.losproductosdelugo.com da Deputación que conta hoxe con 80 empresas e 400 produtos e servizos.
