O Presidente recibe a 28 rapaces de Nantes que participan nun intercambio lingüístico e cultural en Lugo
O Presidente da Deputación de Lugo, José Ramón Gómez Besteiro, recibiu este martes no Salón de Plenos de San Marcos a un grupo de 28 rapaces do centro escolar Aristide Briand da cidade francesa de Nantes que participan nun programa de intercambio lingüístico e cultural en Lugo co colexio dos Franciscanos. O centro de ensinanza lucense mantén intercambios con colexios do país veciño dende hai 3 anos.
Os alumnos franceses, que recibiron como obsequio o libro sobre o Camiño do Mar editado pola Deputación, regresan hoxe a Nantes, despois de 7 días de estancia en Lugo, onde conviviron con familias, co resto dos alumnos do colexio, compartiron con eles clases, e asistiron a algunha competición de atletismo do centro, ademais de viaxar á Coruña e a Santiago.
A visita a Lugo é a segunda parte dun intercambio que arrancou coa estancia de 25 rapaces dos Franciscanos en Nantes entre os días 16 e 21 do pasado mes de marzo. A comunidade educativa cualifica de excelente a experiencia, tanto por parte dos alumnos, como das familias, pois os rapaces participantes na iniciativa, non só perfeccionan o idioma, senón que coñecen outro lugar e outras costumes. É toda unha experiencia vital e cultural, subliñan dende o centro lucense.
