A Deputación inviste máis de 700.000 euros nas estradas da Terra Chá
A Deputación leva o seu Plan de Rebacheo á comarca da Terra Chá. O organismo provincial leva a cabo obras de mellora das vías provinciais dos concellos de Abadín, Cospeito, Begonte, Castro de Rei, Guitiriz, Muras, A Pastoriza, Vilalba, Xermade, Meira, Pol, Ribeira de Piquín e Riotorto. As obras están a piques de finalizar salvo no caso de Meira, o único concello que aínda non executou o plan posto que está previsto que as actividades de acondicionamento comecen o vindeiro día 8 de agosto. . Na Terra Chá foron analizados unha media de 730 quilómetros para facer unha valoración da situación real das estradas e comezar coas obras nos puntos máis perigosos do trazado, achegando máis 700.000 euros. A finalidade do proxecto é mellorar a situación das vías urbanas e interurbanas da provincia para, previr riscos, evitar o éxodo rural e tamén crear postos de traballo, xa que as concesións das obras de reforma van dirixidas a autónomos e pequenas empresas da zona.
Mellora das infraestruturas
A Deputación fai un grande esforzo na conservación e mellora da rede viaria provincial, a máis extensa de España con máis de 4.000 quilómetros. O organismo provincial destina máis de 5 millóns de euros ás tarefas de bacheo, que consiste no acondicionamento con rego asfáltico de todos e cada un dos puntos que o necesitan. Os traballos, que comezaron a principios de xuño, atenden ás necesidades recompiladas previamente polos técnicos provinciais. Os traballos acometéronse con cargo ó Plan de Conservación de Estradas 2013, a través do que a Deputación está a actuar no 100 % das vías da provincia. Para garantir unha atención rápida e eficaz ós veciños e aforrar custes, a institución luguesa dividiu a rede viaria en 8 zonas de actuación.
