Éxito de convocatoria dos II Sábados Artesáns cunha participación de máis de 200 persoas
Máis de 200 persoas participaron na 2ª edición dos Sábados Artesáns, un proxecto organizado pola Asociación de Artesáns Terras de Lemos, o Centro do Viño da Ribeira Sacra e o Concello de Monforte, coa colaboración do organismo provincial. Esta iniciativa conxunta, ofreceu todos os sábados do mes de agosto demostracións de artesanía en vivo, abertas ó público e gratuítas, nas instalacións do Centro do Viño.
Un obradoiro dedicado ó coiro pechou hoxe os II Sábados Artesáns. Fernando Peña Novo e José Ramón LLeó encargáronse, de 11:00 a 14:00 horas no Claustro do Centro do Viño, de ensinarlle ós participantes como se traballa ese material.
O Centro de Artesanía e Deseño da Deputación achegou a 12 artesáns a esta cita, a maioría da Ribeira Sacra, para demostracións en vivo de distintas disciplinas artesáns: téxtil, madeira, cerámica, cestaría e coiro. Fíxoo dentro da súa aposta de pór en valor a artesanía típica da provincia, o que contribúe a dinamizar a economía local.
A primeira cita, dedicada ó téxtil, correu a cargo de Dolores López Vázquez, Pilar Rodríguez Gonda, Susana Ares Rosende e María José Vila González; especialistas, respectivamente, en pintura en tea, lá, bordado creativo e encaixe de bolillos. Na segunda xornada tivo lugar unha talla en madeira en vivo levada a cabo por Mónica Rodríguez Vázquez e José Luis García Moreira. O terceiro sábado foi a quenda dos artesáns da cerámica: Amparo Scrich Albentosa e Otilia Arias. A cestaría foi o campo no que versou a cuarta xornada, cuxa exhibición correu a cargo de Lola Tourón e María Otero.
