A Deputación dota ao Concello de Bóveda dunha estación de tratamento de auga potable
O Presidente da Deputación, José Ramón Gómez Besteiro, acompañado do Alcalde de Bóveda, José Manuel Arias López, informou este mércores que o organismo provincial dotará ao Concello dunha nova estación de tratamento de auga potable así como a reposición de tubaxes na parroquia de Guntín. Estas obras de xustiza tal e como afirmou o mandatario provincial melloran o abastecemento de augas do 80 % da poboación do Concello, de aí a importancia dela. Gómez Besteiro insistiu na necesidade de dotar ao rural de infraestruturas e servizos para os veciños, co fin de mellorar a calidade de vida do veciños e fixar poboación.
O organismo provincial, tal e como explicou o Presidente, construirá un novo depósito de auga de 400 m3. A obra inclúe un decantador físico-químico á entrada da depuradora para eliminar da auga substancias tóxicas e residuos sólidos, evitar a abrasión das bombas ou desgaste dos materiais así como potabilizar a auga. Do mesmo xeito, a institución provincial impermeabilizará dous depósitos de augas e dotará á parroquia lucense de Guntín dunha nova traída de augas. Estas actuacións teñen un orzamento que suma 386.155 euros.
Pola súa banda, o Alcalde de Bóveda agradeceu á Deputación a súa colaboración nesta obra tan necesaria, dificilmente asumible para un Concello como o de Bóveda.
Máis melloras
O Presidente da Deputación supervisou tamén o remate doutras obras no Concello por un valor superior aos 20.000 euros. Por unha banda, a institución provincial rehabilitou a Capela da Raíña, unha das actuacións máis demandadas polos veciños debido á tradición histórica do templo, así como a Capela de San Martín, na que se restauraron os teitos e muros. Do mesmo xeito, ampliou unha estrada de titularidade provincial tamén en San Martín, que tamén foi cuberta con emulsión de triple rego. Grazas a esta actuación do organismo provincial ampliouse a seguridade vial para que tractores e maquinaria poidan utilizar esta vía.
