Deputación, Concello e ANASBABI darán visibilidade ás enfermidades raras cun abrazo solidario á muralla
![Imaxe deputación de lugo](/sites/deputacionlugo.org/files/default_images/depulugo001.jpg)
Deputación, Concello de Lugo e a Asociación Nacional de Ciclopatías (ANASBABI) darán visibilidade ás enfermidades raras a través dun abrazo solidario á muralla luguesa, que terá lugar mañá, 7 de setembro.
Todas as persoas queiran participar neste acto reivindicativo en defensa deste tipo de enfermidades deberán achegarse mañá ás 17:00 horas á Porta de Bispo Aguirre.
A Deputación colabora na difusión da xornada, así como a través da Fundación TIC, que gravará toda a xornada e elaborará unha reportaxe sobre este abrazo solidario, co fin de achegar á cidadanía a problemática das persoas que sofren algunha enfermidade rara.
Dende os colectivos afectados demandan un maior compromiso na investigación deste tipo de enfermidades, tanto a nivel de prevención como paliativo. Cómpre destacar que en Galicia son máis de 300.000 as persoas que sofren algunha destas enfermidades.
Campaña informativa
Mañá mesmo, a Asociación Nacional de Ciclopatías instalará na praza Anxo Fernández Gómez unha carpa informativa. Nela, ANASBABI, en colaboración con outras asociacións de doentes, ofrecerá información á cidadanía sobre este tipo de enfermidades, que en España sofren ao redor de 3 millóns de persoas.