O Presidente da Deputación de Lugo clausura o acto de inauguración da XXIII Reunión da Sociedade Galega de Patoloxía Dixestiva
O Presidente da Deputación de Lugo, José Ramón Gómez Besteiro, clausurou este venres o acto de inauguración da XXIII Reunión da Sociedade Galega de Patoloxía Dixestiva que se celebra no Pazo de San Marcos ata mañá. Gómez Besteiro realizou a súa intervención en castelán dado que a maior parte dos profesionais asistentes son de fóra de Galicia. No acto no que tamén estiveron presentes o Presidente do Comité Organizador, Leopoldo López Rosés, o Director Provincial do Servizo Galego de Saúde, José Luis Rodríguez López e o acalde de Lugo, José López Orozco, Gómez Besteiro destacou a calidade das xornadas nas que se abordan asuntos tan importantes como a problemática do cancro de páncreas ó tempo que se congratulou de que o Pazo de San Marcos sexa o espazo elexido para a celebración desta Reunión. O novo equipo de goberno está abrindo esta institución para todos os que, como vostedes, fan posible que todos os nosos cidadáns teñan a mellor calidade de vida posible, como di o lema da Deputación, SUMANDO ESFORZOS é a única maneira de que consigamos o mellor para a nosa sociedade. Antes de dar por inauguradas estas xornadas, Gómez Besteiro, incidiu en que a provincia de Lugo conta cunha poboación envellecida, polo que os achaques de saúde son tamén mayores; dobre motivo para que esta Reunión sexa de notable interés para todos nós. Finalmente, convidou ós asistentes a que descubran a historia, a paisaxe e a gastronomía da nosa provincia.