O Presidente da Deputación anuncia en Becerreá que os Concellos da Montaña terán dotacións de extinción de incendios
![](/sites/deputacionlugo.org/files/Imagenes/0_3052_1.jpg)
O Presidente da Deputación de Lugo, José Ramón Gómez Besteiro, visitou oficialmente este martes o Concello de Becerreá, dentro da rolda de entrevistas que está a realizar a todos os Alcaldes e Alcaldesas da provincia. Gómez Besteiro, que foi recibido polo rexedor, Manuel Martínez, anunciou que este municipio, ó igual que os do resto da Montaña, terá unha dotación para atender os casos de emerxencia. Existe o compromiso real da Consellería de Presidencia e da Deputación para dar un tratamento específico ós Concellos da Montaña, xa que non responden ós parámetros do resto da provincia, pola súa orografía e as condicións metereolóxicas durante o inverno. Estamos a traballar para que cada Concello conte cun miniparque que permita ser operativos nesta zona onde é más difícil responder ós sinistros de forma inmediata, dixo Gómez Besteiro, quen tamén afirmou que é de sentido común que se trate de xeito específico para que os veciños desta comarca teñan os mesmos dereitos que o resto da provincia. Convenio para as piscinas Este foi un dos asuntos abordados por Gómez Besteiro con Manuel Martínez, quen cualificou a visita de histórica porque é a primeira vez, na etapa democráctica, que un Presidente da Deputación visita oficialmente este Concello. O Presidente da Deputación e o Alcalde de Becerreá asinaron o convenio para a construción das primeiras piscinas municipais desta localidade, cabeceira da comarca dos Ancares, e que conta cunha poboación de 3.246 veciños. Esta dotación, moi demandada polos veciños, estará ubicada á carón da área recreativa do Parque de Xesteda, moi preto do casco urbano, desde o que hai un fácil acceso a pé. O acordo asinado entre os responsables dos dous organismos prevé un investimento de 990.000 euros que serán aportados pola Deputación. Sólo industrial Os máximos responsables provincial e local visitaron os terreos donde se construirán estas piscinas, así como o polígono industrial da localidade, que ten o solo esgotado. O rexedor plantexou a necesidade de crear un novo parque e amosou ó Presidente a parcela que propón o Concello para a súa ubicación. Gómez Besteiro dixo que para fixar poboación, e mesmo atraer veciños de fóra, é fundamental que haxa solo inustrial. Becerreá está moi ben comunicada, non só con resto de Galicia, senón tamén con Castela, grazas a A-6, e a Deputación estudará a creación deste parque sempre en cado non sexa considerado preferente pola Xunta de Galicia. A continuación o titular da Deputación estivo no edificio da antiga Escola de Educación Infantil, onde o Concello ten previsto ubicar un telecentro con biblioteca, videoteca, aulas de formación e sala de lectura. Manuel Martínez solicitou unha axuda ó organismo provincial para reparar os sistemas eléctrico e de calefacción. Outra das peticións plantexadas polo Alcalde é o acondicionamento con aglomerado en quente das vías de acceso á parroquia de Penamaior. O Presidente da Deputación asinou no libro de ouro do Concello de Becerreá e entregou ó Alcalde, como agasallos institucionais, unha bufanda de seda e unha lámpada, ambalas dúas pezas elaboradas por artesáns do Centro de Artesanía e Deseño. O Alcalde de Becerreá agradeceu a visita do Presidente a amosouse seguro de que a colaboración entre as dúas institucións será fructífera.