Clausurado o curso de “cestería tradicional galega de vimbio. Paxes de Viveiro e Carballo”
Onte rematou no Centro de Cestería do río Rato o curso de cestería tradicional galega de vimbio. Paxes de Viveiro e Carballo, incluído na programación de primavera do Centro de Artesanía e Deseño da Deputación de Lugo. No obradoiro, impartido por Carlos Fontales, participaron un total de 8 alumnos chegados de distintos puntos de Galicia: 2 de Pontevedra, 1 de Ferrol e o resto da provincia de Lugo, o que deixa entrever a importancia e a trascendencia que teñen estes cursos, xa que cada vez son máis os artesáns e persoas interesadas que acuden á escola luguesa para aprender e profundizar nas principais técnicas de cestería. Á procedencia dos alumnos, que cada vez é máis dispar, hai que engadirlle a idade dos participantes. Alumnos cada vez máis novos amosan o seu interese por estes obradoiros. Deste xeito, a media de idade deste curso que acaba de rematar ronda os corenta anos. Dos oitos participantes, 4 tiñan entre 30 e 35 anos, 2 corenta e o resto máis de sesenta. Tal e como estaba previsto, nos dous primeiros días os alumnos, ademais de aprender a identificar os materiais e ferramentas, construíron o paxe típico do Concello coruñés de Carballo, mentres que o mércores e o xoves elaboraron un carabelo, denominación que recibe o paxe na Mariña luguesa. Estas dúas modalidades, a diferenza dos outros cestos que se fabrican no resto de Galicia, teñen unha estrutura cadrada, o que permite que sexan perfectamente adaptables ó corpo. Antigamente, empregábanse para recoller as patacas, a herba ou o millo. Para a súa elaboración os alumnos empregaron o vimbio plantado no Centro de Cestería do río Rato. O obxectivo destes obradoiros é recuperar a cestería, un dos oficios máis tradicionais de Galicia, pero que co paso do tempo se foi perdendo. Tal é así, que na actualidade só quedan dous artesáns en Galicia que fabriquen este tipo de cestería, Ramón Laxe en Burela e Carmen Arnejo en Entrecruces (Carballo). O curso dispuxo de 16 horas de formación e desenvolveuse de 16:00 a 20:00 horas desde luns ata o xoves, 3 de abril. Terceiro curso de primavera Esta tarde dará comezo tamén no Centro de Cestería do río Rato o terceiro curso cestería de palla e silva. Niño de xardín, incluído na programación de primavera do Centro de Artesanía e Deseño da Deputación de Lugo. Desde o catro ó seis de abril, ámbolos días inclusive, os alumnos asistirán á proxección en DVD sobre o proceso de fabricación, aprenderán a identificar os materiais e ferramentas para a preparación de tireta de silva coa que elaborarán a peza segundo a técnica de espiral cosida. O obradoiro será impartido polo artesán Carlos Fontales. Dispón de 20 horas de formación e de 8 prazas. Desenvolverase en horario de 16:00 a 20:00 horas o 4 de abril, os días 5 e 6 de 10:00 a 14:00 horas e de 16:00 a 20:00 horas. Ámbolos dous cursos inclúense dentro da programación de primavera formada por 10 cursos diferentes nos que os asistentes, ademais do vimbio, traballarán con outros materiais como a palla, a silva ou o esparto. Obradoiros portátiles Os obradoiros portátiles de tapiz, cestería e instrumentos continúan o seu percorrido polos distintos colexios da provincia. Os alumnos de Primaria e Secundaria están a ser os destinatarios desta iniciativa que busca recuperar os oficios artesanais desde a etapa escolar dándolles ós rapaces a oportunidade de aprender e coñecer oficios de grande tradición na provincia. Deste xeito, desde o luns ata o venres día 11, os alumnos do CEIP Luis Pimintel de Lugo profundizarán nas técnicas máis coñecidas de cestería. Pola súa banda, os estudantes do CPI de Castroverde, desde o luns ata o mércores, e os do CEIP de Baralla, os días 11 e 12 de abril, coñecerán a metodoloxía do tapiz. Asimesmo, os CEIP do Corgo, desde o 7 ata o 9, e o CEIP nº 1 de Foz, os días 11 e 12 de abril, aprenderán o procedemento para a elaboración de instrumentos musicais.
