A cestería tradicional galega de vimbio centra o segundo curso de cestería de primavera do CENTRAD
A cestería tradicional galega de vimbio centra o segundo curso da programación de cestería de primavera do Centro de Artesanía e Deseño da Deputación de Lugo. Desde mañá ata o xoves 3 de abril, os asistentes, ademais de profundizar na identificación de materiais e ferramentas, coñecerán a técnica de elaboración de paxes da zona da Mariña luguesa Viveiro- e da Costa da Morte Carballo-. O docente Carlos Fontales imparte este obradoiro que se desenvolve no Centro de Cestería do río Rato de 16:00 a 20:00 horas. Está dirixido a cesteiros profesionais, artesáns doutras disciplinas e ó público en xeral. Dispón de 16 horas de formación e unha capacidade para 8 alumnos. Este curso inclúese dentro da programación de primavera formada por outros 9 obradoiros que se impartirán no centro de cestería do río Rato, a mellor escola de España e de Europa pola variedade de técnicas que imparte. En total 10 cursos diferentes nos que os asistentes traballarán con materiais moi diversos: vimbio, palla, silva e esparto. Obradoiros portátiles Os obradoiros portátiles de tapiz, cestería e instrumentos continúan esta semana nos colexios da provincia. Os alumnos de Primaria e Secundaria están a ser os destinatarios desta iniciativa que busca recuperar os oficios artesanais desde a etapa escolar dándolles ós rapaces a oportunidade de aprender e coñecer oficios de grande tradición na provincia. Neste senso, desde o martes 1 ata o xoves 3 de abril, os alumnos do CEIP Terra Chá de Vilalba descubrirán distintas técnicas para a elaboración de instrumentos musicais. Asimesmo, desde o luns ata o mércores día 2, os estudantes do Centro Educativo de Infantil e Primaria do Corgo poderán profundizar nun dos oficios artesanais máis coñecidos, a cestería. A vindeira semana será a quenda dos alumnos dos CEIP Luis Pimientel de Lugo, Corgo, Foz, Castroverde e do CPI de Baralla.
