A Deputación renova o seu esforzo por garantir que as praias mariñanas sexan un referente de calidade en España

A Vicepresidenta Segunda da Deputación, Lara Méndez, presidiu este venres en Viveiro unha reunión coa que arrancou o proceso para renovar a certificación medioambiental ISO 14001 das praias mariñanas, uns traballos que financiará ó 100% o organismo provincial, como xa fixo o pasado ano para a implantación deste prestixioso selo de calidade. No encontro participaron a representación técnica que se ocupará de facela auditoría de seguimento e técnicos municipais de Viveiro, Burela, Foz e Ribadeo, os catro Concellos que aspiran a continuar co distintivo. O Vicedo, que se sumou voluntariamente ó proxecto o pasado ano, desvinculouse agora para a renovación do certificado sen argumentar ningún motivo. Deste xeito, a non ser que asuma esta tarefa con fondos propios, perderá o selo que conseguira na tempada estival de 2010 para tres dos seus areais (Xilloi, Abrela e Areagrande).

Este tipo de recoñecemento leva consigo tres tipos de beneficios directos para os Concellos. Por un lado, ambiental, un dos máis visibles, pois o selo implica a incorporación de melloras continuas nos areais. Deste xeito, as entidades locais que este ano renoven o certificado aplicarán actuacións que contribúan a optimizar a limpeza e a xestión de residuos das praias. Por outra banda, un beneficio de imaxe, dada a promoción que leva consigo, xa que as praias con este certificado, concedido segundo a normativa europea EMAS, figuran nun rexistro oficial da Administración Autonómica ó que teñen acceso a cidadanía en xeral e os operadores turísticos. Así mesmo, abre portas á participación en feiras e salóns turísticos, e permítelles ós municipios distinguidos diferenciarse da competencia neste tipo de certames, mellorando o seu posicionamento ante a sociedade. Por último, leva consigo un beneficio económico, pois coa optimización da recollida de residuos, as entidades locais acaban reducindo custes e tamén o risco de recibir sancións por irregularidades medioambientais.

Aínda que os Concellos se comprometeran a asumir os custes das auditorías necesarias para renovar a ISO 14001, que deben facerse cada ano, a Deputación tomou a decisión de financiar esta primeira avaliación, tendo en conta a delicada situación económica pola que atravesan as administracións locais. Deste xeito, a institución lucense afórralles 7.300 euros a cada un dos municipios participantes, reforzando a súa aposta por que as praias mariñanas sexan un referente de calidade en España e, ó mesmo tempo, potenciando a súa liña de cooperación e asistencia ós municipios da provincia. A Vicepresidenta Segunda pediu neste senso unha actitude de colaboración e corresponsabilidade dos Concellos para que nos próximos anos se fagan cargo das auditorías.

O procedemento de avaliación debe estar concluído en decembro. Trala baixa de O Vicedo, as praias que serán sometidas a exame son 17:

- Ribadeo: As Catedrais e Os Castros
- Foz: Areoura, Llas, Peizás, As Polas, A Rapadoira, Os Xuncos, Alemáns, Pampillosa e Arealonga
- Burela: A Marosa, O Portelo e Ril
- Viveiro: Covas, Area e Sacido

Diferenza na xestión das praias

Lara Méndez comprometeuse a “seguir colaborando en tódolos aspectos, non só monetario, cos Concellos para afrontar as necesidades que se lles plantexen”. Por outra banda, lamentou que O Vicedo se descolgue da certificación medioambiental, “quedándose á marxe dunha iniciativa tremendamente positiva para a comarca”, como xa o fixeran o pasado ano Cervo, Xove e Barreiros, que rexeitaron sumarse á implantación do selo. Méndez aludiu á diferenza na xestión das praias entre os Concellos adheridos ó proxecto con respecto ós que optaron por non facelo, “como demostra por exemplo que Cervo recibise recentemente unha comunicación da Consellería de Sanidade na que se lle advertía da existencia de cristais, residuos orgánicos, plásticos, madeiras e algas en descomposición na Caosa, Cubelas e O Torno, unha situación de abandono que se tería evitado precisamente coa aplicación das medidas que esixe a ISO 14001”.

Neste senso, a Deputada mariñana subliñou este é un distintivo “que se rexe pola normativa da Unión Europea máis estrita e esixente, a EMAS, e que garante praias de auténtica calidade”. Unha mostra dese rigor é que, “non só se debe controlar a calidade das augas, senón que é obrigatorio que todo cumpra as normas, por exemplo, que un traballador ou unha máquina teña os permisos en regra”. Coa súa implantación, a de Lugo pasou a ser a terceira costa de España, despois da de Valencia e Cataluña, con máis areais que locen este selo. Méndez destacou así mesmo a promoción e impulso que este certificado supón para o sector turístico da Mariña, un dos piares da economía da comarca, favorecendo a súa desestacionalización.

Lara Méndez lembrou que a distinción implantada pola Deputación vai máis alá da Bandeira Azul, pois mentres esta última é unha fotografía da praia que se dá nun determinado momento, a ISO 14001 garante unha excelente calidade medioambiental e de servizos, ademais dunha mellora continua dos areais. Tamén supón un valor engadido con respecto á Q de Calidade Turística, pois non só atende ás demandas dos turistas que marcan as empresas, senón tamén ás leis medioambientais dos expertos da Unión Europea. De aí que garanta unha correcta xestión medioambiental, minimizando o impacto nas praias e, o que é máis importante, nos veciños.

Premio por un traballo ben feito

O traballo medioambiental realizado pola Deputación coa implantación da ISO 14001 en 20 praias da Mariña mereceu o premio AENOR, que recolleu o Presidente, José Ramón Gómez Besteiro, na pasada edición da Feira Internacional de Turismo (FITUR) de Madrid.