Centos de lucenses coñeceron o labor da Escola de Imaxe e Son nas segundas xornadas de portas abertas ABERTIC
Centos de lucenses participaron este xoves na segunda edición das xornadas de portas abertas ABERTIC, organizadas pola Fundación TIC nas instalacións da Escola de Imaxe e Son (EIS) de Lugo para dar a coñecer á sociedade o labor formativo deste centro, o único público da provincia que imparte ensinanzas no eido audiovisual. Nesta iniciativa, que repetiu deste xeito o éxito de público da edición do pasado ano, os alumnos da EIS puxeron en práctica, co apoio de docentes e técnicos, os coñecementos adquiridos durante o curso a través de obradoiros de radio, televisión e fotografía, abertos á participación de todos os que visitaron as instalacións da Escola ó longo da xornada.
O Presidente da Fundación e da Deputación, José Ramón Gómez Besteiro, achegouse ó centro educativo para participar no ABERTIC e destacou a importancia deste tipo de xornadas para que os lucenses coñezan de primeira man o labor que desenvolvemos na TIC, orientado á inserción laboral dos nosos alumnos. Ademais, o máximo responsable provincial dixo que deste xeito tamén contribuímos a achegar o mundo das novas tecnoloxías ós habitantes da nosa provincia.
A sociedade lucense coa TIC
Representantes de produtoras, organizacións relacionadas co mundo audiovisual e medios de comunicación comprobaron in situ o nivel formativo adquirido polos alumnos durante o curso, baseado en prácticas en escenarios reais. Entre outros, Galicia Dixital, Grupo fotográfico Fonmiñá, Miñomedia, Imaxina e Coolfims. Ademais, participaron membros de diversas asociacións culturais e deportivas, como Achádego Teatro, Nova Escena Teatro, Palimoco, Parafono, Breogán ou Azkar Lugo.
Tamén foi destacada a presenza de alumnos e profesores doutros centros educativos que colaboraron cos estudantes da Escola de Imaxe e Son na realización de prácticas de radio, fotografía e televisión. Entre outros, os IES Muralla Romana, Virxe dos Ollos Grande, Lucus Augusti Politécnico e o colexio San Xosé.
Obradoiros de radio, televisión e fotografía
O programa ABERTIC, que se desenvolveu de 11:00 a 20:00 horas, tanto nos exteriores como dentro das instalacións da Escola, comezou coa recepción dos asistentes cun posado no photocall situado á entrada, e incluíu obradoiros de radio, televisión e fotografía. Deste xeito, as persoas que se achegaron á EIS tiveron a oportunidade de formar parte dun programa radiofónico con entrevistas en directo, coñecer os segredos da televisión por dentro e retocar fotos e vídeos para compartilos nas redes sociais. Os vídeos que realizou cada participante están subidos na canle que a Fundación TIC ten en Youtube. A xornada contou tamén con representacións teatrais e o traballo dunha unidade móbil con tres cámaras, que foi a encargada da gravación e realización dos eventos da xornada.
Novidades desta edición
Entre as moitas novidades deste ano, destacou a música en directo que ofreceu o grupo lucense de estilo indie/rock Winter in Berlín e o Dj Alejandro Losada dende a terraza da EIS.
O obxectivo foi reproducir una mostra do FIBES, o I Festival Itinerante de Balcóns e Espazos Sonoros, unha iniciativa pioneira en Galicia, organizada o pasado 10 de maio polos alumnos de primeiro da Escola na cidade con grande éxito. Os estudantes tamén representaron a primeira escena da obra teatral do sevillano Alejandro Butrón Apoloxía do cuarto de baño. Tamén houbo un flahsmob no que competiron alumnos de Realización e Produción.
Na Sala de Proxeccións tivo lugar a proxección ininterrompida de traballos dos alumnos de primeiro, en concreto a recreación de secuencias das longametraxes La vida es bella, Crimen ferpecto, Mi vida sin mí e Full Monty. Tamén se pasaron as reportaxes Pendurando no tempo, que recolle os negocios de Lugo máis antigos, Familias en Desventaxa, Guetos, sobre as desigualdades sociais e a integración, e Online sobre as redes sociais a a súa incidencia nas nosas vidas.
Entrega de diplomas
O Presidente da Deputación e da Fundación TIC foi a encargado da entrega dos diplomas ós novos titulados en Imaxe e Son da novena promoción, que cursaron estudos no período académico (2011-13).
Ademais, ó igual que o ano pasado, regalouse a todos os asistentes unha carpeta cun DVD cos mellores traballos do curso 2012-13 e información da EIS e o proceso de matrícula para o vindeiro curso.
