Un curso amosa no Centro de Interpretación como elaborar ungüentos naturais a base de plantas comúns
A Deputación de Lugo organiza o curso Herbas Máxicas, fabricación de ungüentos no Centro de Interpretación Terras do Miño os días 7 e 8 de setembro. Con este curso, a Deputación pretende proporcionar a formación necesaria ós participantes para poder identificar e coñecer as aplicacións de plantas medicinais máis comúns e manipulalas para obter preparados curativos e administralos, ante o cal un experto ensinará as pautas previas e repartirá o material para que os asistentes leven á práctica a teoría do curso. O obxectivo da Deputación é que ó finalizar o taller, os asistentes recoñezan as plantas máis comúns do noso ámbito, a súa relación co medio e a maneira de utilizalas con fins terapéuticos. O horario destas actividades será para tanto o sábado coma para o domingo de 11:00 a 14:00 horas.
Últimas prazas
O curso está programado para maiores de 18 anos, e ten unha oferta de 40 prazas, das cales aínda se atopan dispoñibles as últimas na páxina web: www.deputacionlugo.org. Os interesados poden inscribirse picando no enlace: Actividades Medioambientais do Centro de Interpretación Terras do Miño, onde se atopa o formulario que é preciso cubrir. Para máis información, pódese enviar un correo a und.medioambiente@deputaciónlugo.org, ou ben chamar ó teléfono 982227812.
Actividades para toda a familia
Ademais, neste mes de setembro, a Deputación ten organizadas máis actividades para toda a familia, como unha Gymkana Medioambiental, para os días 14 e 15 deste mes, ou como os obradoiros infantís de Cociña Saudable. Tamén, neste mes de setembro chegarán as conferencias de divulgación científica, os días 12 de setembro, na que o catedrático da Escola Universitaria de Formación do Profesorado, Uxío Otero, disertará sobre Os valores educativos da natureza e 26 de setembro, cando diversos poñentes falarán acerca dos Valores e potencialidades da Reserva da Biosfera de Os Ancares lucenses. Do mesmo xeito, continúa aberta a exposición Pegadas para a terra, que analiza o papel de diferentes colectivos e persoeiros en prol da defensa do medio ambiente e os dereitos humanos.