Gómez Besteiro: 'só dende a realidade podemos desmontar as políticas de austeridade empobrecedora'
O Salón de Actos quedou pequeno para acoller ó numeroso público asistente á conferencia ofrecida hoxe por destacados membros do colectivo Economistas frente a la crisis, que escolleron a Deputación de Lugo para presentarse oficialmente en Galicia. Durante o acto, Gómez Besteiro destacou que o mellor que pode facerse fronte a unha concepción conservadora da política é combatila no terreo da realidade e que precisamente só dende a realidade pódense desmontar as políticas de austeridade empobrecedora que tanto dano nos están a facer.
O máximo responsable provincial subliñou que estas políticas empobrecedoras son as que provocan que hoxe os 20 españois máis ricos acumulen tanta renda como o 20% da poboación máis pobre, unha situación fronte á que existen alternativas, alternativas reais. Do mesmo xeito, identificou un dos grandes desafíos da política, con xerar confianza para reducir a inseguridade colectiva da que todos somos vítimas. O Presidente tamén apostou por unha concepción da realidade que sexa mellor para todos, non para unha elite privilexiada
Os poñentes
O presidente de Economistas frente a la crisis, Jorge Fabra, encarou o tema central da conferencia Hai outra economía. En prol do benestar dos cidadáns, destacando que o que se está a facer na actualidade non é economía senón ideoloxía, e aconsellou medidas como os estímulos fiscais ou a reactivación do gasto público para a recuperación tras a crise que, aínda que posible, será lenta.
Pola súa banda, Alfonso Prieto analizou os novos modelos de crecemento o de mercados de traballo e apostou por novos modelos baseados na calidade do emprego e en políticas de industralización que, segundo destacou, foron abandonadas hai anos. Mónica Melle analizou as desigualdades entre os países europeos a desvelou algunhas das mentiras que se teñen contado sobre este crise económica e como esta acrecenta a fenda entre os cidadáns, como o feito de que foron realmente as clases con maior poder adquisitivo as que contribuíron de xeito más claro á formación da burbulla inmobiliaria, coa compra especulativa de segundas e terceiras vivendas.
Como noutras ocasións, todos os que non puideron asistir en directo puideron seguilo en streaming dende calquera ordenador e dispositivo móbil grazas ó traballo da Fundación TIC, que o retransmitiu en tempo real a través da web www.deputacionlugo.org.
