28 lucenses que estaban no paro traballan en Concellos da zona Sur co plan de emprego da Deputación
![Imaxe deputación de lugo](/sites/deputacionlugo.org/files/default_images/depulugo001.jpg)
28 lucenses que estaban no paro traballan agora na Pobra do Brollón, Ribas de Sil, Quiroga, Samos e O Incio, realizando melloras de servizos públicos municipais. Fano mediante o plan de emprego da Deputación para Concellos de menos de 5.000 habitantes, que foron excluídos dos obradoiros ou escolas taller da Xunta dende 2009 e que integran a Rede Natura.
O organismo provincial financia na súa totalidade esta programación con 2 millóns de euros, posto que asume as retribucións dos traballadores e os custes da seguridade social das 80 persoas que en total foron contratadas en 12 Concellos e que xa están a traballar. Xunto ós mencionados 5 municipios do sur lugués, os restantes Concellos son: Cervantes, A Pontenova, Navia de Suarna, Negueira de Muñiz, Becerreá, A Fonsagrada e Pedrafita do Cebreiro.
O presuposto que achega á zona Sur é de 733.137 euros. O reparto deste orzamento é o seguinte: Quiroga, 216.120 euros para 8 traballadores; Ribas de Sil, 135.075 euros para 5 traballadores; Samos, 135.075 euros para 5 traballadores; O Incio, 135.075 euros para 5 traballadores; A Pobra do Brollón, 111.792 euros para 5 traballadores. Neste último caso, o orzamento é inferior porque o propio Concello solicitou que as retribucións destes traballadores sexan iguais ás do persoal municipal que desenvolve funcións semellantes.
Adianto ós Concellos
Consciente da situación das arcas municipais, a Deputación ofrece ós Concellos o adianto do 90% do orzamento que lles corresponde. Quiroga, que foi o primeiro en solicitar este anticipo, xa conta con 194.508 euros. Os seguintes municipios que o recibirán, posto que o pediron nos últimos días, despois de Quiroga, será O Incio, que ingresará 121.567 euros; Cervantes, 121.567 euros; A Pontenova, 194.508 euros; e A Fonsagrada, 267.448 euros. En total, a institución adiantaralles 705.180 euros.
15 meses de traballo
O número de traballadores por municipio determinouse polo número de habitantes. Os Concellos foron os encargados de realizar os procesos de persoal. Os 80 seleccionados traballan dende o 1 de abril e durante 15 meses, a diferenza dos obradoiros de emprego doutras administracións nos que os desempregados traballan só 6 meses. As tarefas que levan a cabo consisten en obras no medio rural, intervencións en espazos públicos e naturais, medidas preventivas en defensa do medio ambiente..., en definitiva, priorizan as necesidades imprescindibles para o benestar dos veciños. Polo tanto, este plan, non só crea traballo directo e de calidade, senón que mellora as dotacións públicas nos municipios con menor capacidade económica, combatendo o despoboamento demográfico no rural.