Todos os grupos políticos estarán presentes por primeira vez nas Mesas de Contratación da Deputación
![](/sites/deputacionlugo.org/files/Imagenes/0_3060_1.jpg)
A Xunta de Goberno da Deputación de Lugo aprobou este venres unha proposta da Presidencia que garante por primeira vez a presenza dos tres grupos políticos con representación na Corporación provincial nas Mesas de Contratación. O voceiro socialista, Antonio Gato Soengas, dixo que este é un dos acordos que fai historia na Deputación porque permite que todos os grupos políticos estean presentes nos órganos colexiados como as Mesas de Contratación, algo impensable ata o de agora. Con esta iniciativa, facilítase unha participación máis plural e transparente nas tomas de decisión relevantes para a provincia, e prevese a presenza da oposición no proceso de adxudicación de obras por parte do organismo provincial. Significa cumprir cun compromiso de apertura, transperencia e democratizacion. É unha maneira distinta de facer política desde a propia neutralidade cando se toman decisións políticas que afectan a aspectos importantes da provincia, apuntou Gato Soengas. As mesas de contratación estarán compostas polo Presidente da Deputación, a Delegada de Economía e cadanseu representante dos grupos provinciais do PSOE, BNG e PP, ademais dos funcionarios responsables. Foro Prolugo A Xunta de Goberno tamén ratificou o acordo marco para a constitución do Foro Prolugo que será o encargado de elaborar o Plan Estretéxico da provincia. Este acordo marco foi asinado o 16 de novembro polos máximos responsables da Deputación de Lugo, a Fundación Caixa Galicia, a Universidade de Santiago de Compostela (Campus de Lugo), Concello de Lugo, Confederación de Empresarios e Cámara de Comercio. O obxectivo do Foro Prolugo é mellorar a capacidade competitiva da provincia activando os seus sectores clave, fomentando o seu desenvolvemento tecnolóxico, a formación empresarial, así como a mellora da cualificación profesional e técnica do seu capital humano, a integración territorial e a mellora das infraestruturas culturais, educativas e de comunicación. Outros acordos da Xunta de Goberno Por outra banda, aprobouse a contratración dun novo subministro de sal para os 12 silos que ten ubicados a Deputacion en Cervantes, Becerreá, O Courel, Ribas de Sil, A Fonsagrada, Navia de Suarna, Meira, O Incio, Valadouro, Ouro, Lugo e Pedrafita do Cebreiro. Destínanse 30.000 euros que se suman á mesma cantidade que fora contratada este outono para este fin. Ata o momento empregáronse 600 toneladas de sal nas estradas provinciais para atender as incidencias por mor das xeadas e nevadas. A Xunta de Goberno tamén aprobou as obras de acondicionamento do núcleo de A Millara, no concello de Patón, ás que se destina 38.651 euros. Ademais, ratificouse o decreto polo que se concede unha subvención de 73.102 euros ó Concello de Sarria para colaborar nos gastos de execución das obras de pavimentación e servizos da vía de enlace da zona escolar coa LU-6333.