O equipo xaponés de fútbol sala Human/Falco visita o Pazo de San Marcos convidado pola Área de Deportes da Deputación
Os xaponeses visitan a Cidade das Murallas para coñecer a metodoloxía de traballo e a estrutura interna do Azkar Lugo O delegado a Área de Deporte da Deputación, Antonio Veiga, recibiu este luns, no Pazo de San Marcos, o equipo de fútbol sala xaponés Human/ Falco. No acto tamén estiveron presentes o presidente do Azkar Lugo FS, Manuel Vázquez Corredoira, e outros directivos do club. Ademais, acompañando o equipo xaponés estivo tamén o representante do grupo Human en España, Aoki Rytaro. No transcurso da súa intervención, Antonio Veiga deulles a benvida á Deputación e á cidade de Lugo aos xogadores do equipo de fútbol sala xaponés Human/Falco. Logo disto, o delegado da Área de Deporte da Deputación, loou o traballo realizado polo Azkar Lugo FS en prol do deporte de base. Así, Antonio Veiga asegurou que o bo facer desta entidade deportiva espertou o interese dun club estranxeiro e procedente dun país tan afastado ao noso como é o Xapón. Nesta liña, engadiu tamén que os equipos lucenses, e por extensión, os galegos, temos moito que aprender, pero tamén moito que ensinar neste deporte de base. Ademais disto, Antonio Veiga manifestou que a Área de Deporte da Deputación de Lugo apoia e seguirá apoiando todas aquelas iniciativas que sirvan para potenciar e fomentar a práctica e o desenvolvemento do deporte de base e, tamén, para mellorar os aspectos formativos referidos ás distintas disciplinas deportivas existentes en todas e cada unha das comarcas lucenses. Esta é a segunda vez que o Human/Falco visita a Cidade das Murallas e, desta vez, ao igual ca anterior, os xaponeses pretenten coñecer a metodoloxía de traballo e a estrutura interna do club Azkar Lugo. Un equipo de referencia no eido do deporte de base galego, tal e como o definiu o delegado da Área de Deportes da Deputación, Antonio Veiga. Ademais de asistir ao encontro de liga do conxunto lucense ante o Caja Segovia que tivo lugar o pasado sábado 28 de marzo, o equipo xaponés tamén realizou e realizará varios adestramentos xunto cos xogadores lucenses e participará en varias conferencias. O Human/Falco estará en Lugo ata o vindeiro día 3 de abril.