Empresarias autónomas da provincia participan no programa Km0
Un grupo da Asociación de Empresarias Autónomas da provincia de Lugo participan este martes no programa de visitas medioambientais Km0 cunha ruta que inclúe o eucaliptal de Chavín, no Concello de Viveiro. Ademais, esta semana desprazaranse ata a Ribeira Sacra e Mondoñedo dous grupos da terceira idade de Monterroso e Lugo. O Presidente da Deputación, José Ramón Gómez Besteiro, recibiu esta mañá no Salón de Actos a un grupo de 55 persoas, entre as que hai empresarias autónomas da provincia e membros das Aulas da Terceira Idade de Lugo. Gómez Besteiro dixo que é importante apoiar ós nosos autónomos xa que son os que sosteñen a economía da provincia, e lembrou que apoiar a este sector é, precisamente, un dos obxectivos do programa Km0. Trala recepción, as empresarias visitaron o Museo da Oleiría de Bonxe e viaxaron á Mariña. A ruta inclúe un paseo polo eucaliptal de Chavín, no Concello de Viveiro, formado por árbores centenarias de máis de 80 metros de altura e 2,5 de diámetro. Esta especie de orixe australiana introduciuse na zona hai 150 anos para axudar na drenaxe dos terreos baixos asolagados polos regatos do río Landro. Tamén visitarán varias Casas de Indianos e o Mosteiro de Valdeflores, construído no barrio da Xunqueira no século XIV. O percorrido ramatará no Alto de San Roque. Ribeira Sacra e Mondoñedo Mañá un grupo da Asociación Terceira Idade de Monterroso visitará as instalacións do INLUDES e a Ribeira Sacra onde farán unha ruta a pé ata o Mirador da Pena do Castelo. Ademais participarán nunha degustación nunha das adegas da comarca e realizarán unha travesía fluvial en catamarán por Amandi. Polo que se refire ó xoves, Km0 chegará á zona de Mondoñedo. Tras coñecer as instalacións do Centro de Artesanía e Deseño, un grupo das Aulas da Terceira Idade de Lugo visitará ó emprazamento das Covas do Rei Cintolo, un conxunto de extensas cavidades, cunha lonxitude aproximada de 6 quilómetros de galerías. Continuarán o seu percorrido pola Catedral de Mondoñedo e pola a Fonte Vella, ou Fonte de Álvaro Cunqueiro, e farán unha visita a pé polo Casco Histórico.
