O Courel e Viveiro, destinos esta semana de Km0
O Courel e A Mariña son os destinos elexidos esta semana dentro do programa de visitas institucionais e medioambientais Km0 que promove a Deputación. Nas tres rutas do martes, mércores e xoves, participan veciños do Corgo e de Castro de Rei e membros do Proxecto Home. A Vicepresidenta Segunda da Deputación, Lara Méndez, recibiu este martes no Salón de Plenos a un grupo da Asociación Cultural Arume, do Concello do Corgo, ós que lles explicou o obxectivo desta iniciativa, que pretende dar a coñecer ós lucenses tanto a institución como a riqueza medioambiental e paisaxística da provincia, ademais de promover a nosa economía. Trala recepción no Pazo de San Marcos, os veciños do Corgo visitaron o conxunto etnográfico do Mazo de Santa Comba. A continuación, desprazáronse a Folgoso do Courel onde farán unha ruta de sendeirismo pola Devesa da Rogueira e visitarán a Aula da Natureza de Moreda. Mañá, particirá en Km0 un grupo do Proxecto Home de Lugo. Percorrerán as instalacións do Centro de Artesanía e Deseño. Ademais, tamén elexiron a zona do Courel, aínda que neste caso, visitarán os Castros de Vilar e da Torre e a aldea de Seceda. Por último, o xoves, Km0 desprazarase á Mariña. Un grupo de veciños de Castro de Rei visitarán o Centro de Artesanía e Deseño antes de viaxar ata Viveiro, onde farán un percorrido pola zona dos eucaliptos de Chavín. Tamén visitarán o Mosteiro de Valdeflores e subirán ó Monte de San Roque.
