A Deputación cede terreos para a creación dun complexo deportivo en Castro Riberas de Lea
O Concello de Castro de Rei construirá unha pista polideportiva, outra de aeromodelismo e un campo de adestramento de fútbol A Deputación cederá ó Concello de Castro de Rei unha parcela de 25.000 metros cadrados para a creación dun complexo deportivo en Castro Riberas de Lea, onde a Entidade Local ten prevista a construción dunha pista polideportiva, outra de aeromodelismo e un campo de adestramento de fútbol. A Presidenta en funcións, Lara Méndez, acompañada polo Alcalde deste municipio chairego, Juan José Díaz Valiño, visitou este xoves a parcela, que colinda co novo campo de fútbol e as piscinas municipais, tamén construídos en terreos de titularidade provincial. Lara Méndez afirmou que a cesión destes terreos, por un periodo de 20 anos, inclúese dentro do obextivo da Deputación de promover o desenvolvemento de infraestruturas para contribuír ó impulso económico e social dos nosos municipios. Iste é outro xeito de cooperación cos Concellos, xa que todo o que fagamos en favor das Entidades Locais repercute positivamente nos veciños. A Presidenta en funcións, anunciou que a Xunta de Goberno deste venres aprobará unha adenda ó convenio asinado entre o organismo provincial e o Concello de Castro de Rei en 2004 polo que a Deputación cedía 20.000 metros cadrados para a construción do novo campo de fútbol e as piscinas municipais. Tanto os terreos cedidos inicialmente coma os que inclúe a adenda, pertencen á finca da Granxa Gayoso-Castro, que ten unha extensión dunhas 190 hectáreas, apuntou Lara Méndez. Tres novas pistas O Alcalde de Castro de Rei amosou a súa satisfacción e agracedeu á Deputación a cesión destes terreos, o que fará posible realizar o noso proxecto de crear un importante complexo deportivo en Castro Riberas de Lea, que xa conta co campo de fúltbol e as piscinas. Juan José Díaz Valiño avanzou que nesta parcela se construirán tres pistas: unha polideportiva para a práctica de deportes como o baloncesto, o fútbol-sala, o balonmán ou o tenis; un campo de fútbol de adestramento para o Clube Deportivo Castro e de xogo para as categorías inferiores; e unha terceira de aeromodelismo que pretende traer a Castro o Clube Lavanco. Polo tanto, con esta ampliación do complexo deportivo conseguiremos varios obxectivos: por unha banda, favorecer o deporte base, por outra, facilitar a práctica doutros deportes á marxe do fútbol, e por último, ter unha pista de aeromodelismo, que será a terceira da nosa provincia, ademais das de Begonte e Monforte. O rexedor subliñou que hai pouco máis de 20 días o Presidente da Deputación, José Ramón Gómez Besteiro, estivo neste Concello visitando o remate da obra da estrada que vai de Castro a Cospeito. Ademais, aquel mesmo día anunciou o inminente inicio dos traballos de mellora da vía de Castro Riberas de Lea a Couto de A, 12 quilómetros en aglomerado en quente que comunica o castro de Viladonga, e hoxe anunciamos unha nova actuación. Demóstrase, unha vez máis, a práctica inmediatez coa que a Deputación atende os problemas e as necesidades que temos en Castro de Rei.
