A TIC recollerá nun vídeo o roteiro teatral Son d´Aldea que recrea a vida rural nos anos 40 e 50
Un equipo formado por bolseiros e técnicos da Fundación Tic, trasladarase este sábado á parroquia de Santiago de Albá, en Palas de Rei, para realizar a segunda fase de rodaxe do espectáculo teatral que recrea a vida do campo ambientada nos anos 40 e 50, e que representará o grupo local Metátese Teatro dentro das actividades de Son dAldea. Trátase dunha iniciativa impulsada pola Deputación de Lugo para poñer en valor o rural, en colaboración con varios colectivos sociais e culturais da localidade como Parzamique, a granxa familiar Ecoagroturismo Arqueixal, ademais da entidade teatral citada anteriormente.
A primeira parte da gravación do DVD realizouse a pasada fin de semana durante os ensaios xerais da compañía teatral. A acción transcorre paralelamente en 6 escenarios repartidos por toda a aldea. Así, tomaranse imaxes, por exemplo, no monte, amosando os labores do campo; o forno, recreando o proceso de elaboración do pan; o lavadoiros, incidindo no significado da auga; na escola, salientando a relación entre profesor e alumno; na lareira, revivindo as longas conversas dos veciños, e no tundal, onde se levaban a cabo tarefas de carpintería ou mesmo se grabuñaba a gadaña.
Con este audiovisual, a Fundación TIC divulga a novidosa iniciativa do grupo de teatro palense que se desenvolve por primeira vez en Galicia. Ademais, cumpre co seu obxetivo prioritario; facilitar a inserción laboral dos seus bolseiros e ex alumnos da EIS, cunha experiencia coma esta, na que se poñen en práctica todos os coñecementos audiovisuais que require unha rodaxe con varias accións que teñen lugar ó mesmo tempo.
Numerosas actividades para recrear o presente e o futuro
Son d`Aldea inclúe numerosas actividades que recrearán o modo de vida das aldeas naquela época, que centraban toda a actividade de Galicia ata que a revolución industrial propiciou que a xente se trasladase ás vilas, abandonando o rural. Deste xeito, revivirase o pasado con escenas teatrais, ó tempo que se recreará o presente e o futuro mediante mostras de oficios artesanais que se desenvolverán nas carpas emprazadas no campo da festa de Albá. Nelas participan profesionais lucenses que a día de hoxe seguen a residir e a vivir da actividade das aldeas. Haberá un ferreiro do Carballal (Palas de Rei), un canteiro de Pontaferreira (Antas de Ulla), unha oleira de Bonxe (Outeiro de Rei), un carpinteiro de Ribón (Becerreá), unha cesteira de Carballal (Palas de Rei), ademais dunha tecelá de Arbor, na Coruña, que está a obter moi boa acollida no mercado con pezas feita a man mediante o lino.
Así mesmo, os produtos lucenses protagonizarán a mostra de artesanía alimentaria. Neste senso, expoñeranse o viño da Ribeira Sacra (Adega da Veiga. A ermida. Belesar), os produtos lácteos de Arqueixal (Palas de Rei), o pan de Carteire (Panadería Irene, Palas de Rei), as Maruxas de nata de Cumbraos (Granxa Maruxa. Monterroso), as Galeguesas (Friguesía Santiago de Amorece), as menciñeiras do Coto (Milhalloa Soc. Coop. Palas de Rei), Estruga da Baixa Limia (Mestre Martín), e as Galletas Mariñeiras (Daveiga, Agolada).
Precisamente, serán ditos produtos os que compoñen o menú do Xantar na Aldea que terá lugar ás 14:30 horas. Ademais, a música de Buxaina, María Castaña e Quenlla amenizará toda a xornada. Tendo en conta o espazo dispoñible das carpas que se habilitarán para as mostras e co fin de garantir a accesibilidade ó Roteiro Teatral, o número de persoas que poderán participar en Son d´Aldea é de 400. Deste xeito, organizaranse grupos de 50 persoas para ver as escenas teatrais xunto a unha guía que as explicará polo miúdo. O prezo de entrada é de 20 euros, permitindo a participación en todas as actividades. Os interesados aínda poden facerse cunha enviando un correo a www.sondaldea@gmail.com.
Máis colaboracións
Paralelamente e coincidindo ca cita festiva de Palas, o sábado outro equipo do Centro de Produción e Programas da TIC filmará a V concentración de coches clásicos que organiza a Escudería Portomarín Sport para a elaboración dun vídeo promocional sobre o evento que dará comezo as 10 da mañá na praza do concello da localidade.
Esta colaboración é froito do convenio que a Fundación TIC, dependente da Deputación, vén de asinar coa asociación deportiva para promocionar as actividades que desenvolve. Con esta última incorporación, a Fundación colabora con 46 empresas e asociacións sen ánimo de lucro para divulgar o seu labor. O principal obxectivo é proporcionar unha ampla experiencia laboral ós seus estudantes da Escola de Imaxe e Son co fin de abrirlles novas posibilidades á hora de atopar traballo.
