Mulleres do Rural coñecen na Fonsagrada as vantaxes das novas tecnoloxías coa formación gratuíta do In Lugo
Un colectivo da Asociación de Mulleres do Rural A Nosa Terra coñecen as vantaxes das novas tecnoloxías co curso gratuíto que o In Lugo da Deputación, levou á Fonsagrada. É a acción formativa Iniciación á Informática, na que participan unha decena de persoas logo de solicitala ó 1º Centro de Innovación Social en Galicia, que puxo en marcha a institución luguesa para, precisamente, potenciar a igualdade de oportunidades e a calidade de vida no rural lugués, dando conta de servizos tecnolóxicos.
Por este mesmo motivo, o organismo provincial organizou ata final de ano unha programación itinerante de 55 cursos a custe cero, que se teñen lugar en diferentes Concellos lugueses sempre en base ás peticións dos veciños. Deste xeito, xunto ó mencionado, á Fonsagrada tamén se levaron outros 2: Fácil e Sinxelo, ordea as túas imaxes, música, libros...crea a túa base de datos particular; ¿Emprego? na web encontraralo.
Os restantes municipios onde se desenvolverán accións formativas sobre novas tecnoloxías en resposta ás peticións veciñais son: O Incio, Palas de Rei, Viveiro, A Pobra do Brollón, Foz, Láncara, Mondoñedo, Guitiriz, A Pastoriza, Monforte de Lemos, Becerreá, A Pontenova, Pedrafita do Cebreiro, Burela, Monterroso, Vilalba e Sarria.
Simultaneamente, a capital luguesa está a acoller os cursos: manexa os teus ficheiros no teu ordenador; Ferramentas 2.0 na búsqueda de emprego. 30 persoas participan, sen custe algún, nestas iniciativas que acollen as instalacións do In Lugo.
Prazas libres
A Deputación mantén publicada a programación de cursos gratuítos na páxina web www.deputacionlugo.org onde todos os interesados poden consultala e inscribirse. Para máis información, poden chamar ó teléfono 982-22-51-86 ou ben acudir as instalacións do In Lugo, situadas na rúa Frei Plácido Rei Lemos da cidade luguesa, concretamente, na segunda planta da Escola de Imaxe e Son (EIS). O prazo de solicitude está aberto ata esgotarse as prazas das xornadas formativas, dirixidos a todo tipo de público: mozos e maiores, familias, desempregados, traballadores, emprendedores, empresarios e persoas con discapacidade. Os alumnos recibirán ó finalizar a acción formativa un diploma oficial da Deputación que acredita a súa participación.
A cargo da Fundación TIC
O primeiro centro de innovación social en Galicia, In Lugo, foi creado en marzo de 2011 pola Deputación cun financiamento do 89% do Ministerio de Industria a través do Plan Avanza co fin de promover actuacións e servizos baseados nas novas tecnoloxías encamiñados a mellorar a calidade de vida dos veciños da provincia e dinamizar o tecido económico. Neste 2012 iniciou unha nova andaina, na que, de ser xestionado directamente dende a Deputación, pasou a depender da Fundación TIC co fin de aforrar recursos e crear sinerxias.
