A Capela de Santa María repasa a historia da olería na provincia cunha mostra de homenaxe ós cacharreiros lucenses
A Deputada de Deseño e Artesanía, Regina Polín, acompañada por Higinio Flores, comisario da exposición, presentou este luns Pasado e presente da olería en Lugo, organizada pola Área de Artesanía e Deseño na Capela de Santa María. Unha mostra que nace co obxectivo de dar a coñecer a todos os lucenses a rica tradición oleira da provincia e como esta ten influído nos artesáns actuais xa que, tal e como destacou Polín, o traballo dos cacharreiros lucenses forma xa parte da nosa identidade, e tendo en conta a importancia e o recoñecemento que chegou a acadar máis aló da nosa terra é un patrimonio cultural que non pode desaparecer
A exposición amosará un total de 140 pezas de olería tradicional das catro comarcas que existían na provincia de Lugo Gundivós, Samos, Bonxe e Mondoñedo-, a maior parte das cales proceden de coleccións particulares, e entre as que destacan obxectos que ben poderían formar parte de museos pola súa orixinalidade e antigüidade. É o caso de dúas ámboas, recipientes para almacenaxe de líquidos e cereais, realizadas en Samos nas primeiras décadas do século XVIII.
Precisamente tendo en conta a intención de dar a coñecer ó público en xeral a extraordinaria importancia e calidade que os artesáns lucenses do barro acadaron, a mostra mantén un marcado carácter didáctico: xunto ás pezas expostas, haberá numerosos paneis explicativos que, con texto e imaxes, facilitarán a comprensión de diferentes aspectos tanto das pezas coma os elementos diferenciadores das catro comarcas oleiras, así coma do traballo destes artesáns. Ademais dos paneis, haberá material audiovisual que facilitará ós asistentes a comprensión do proceso de elaboración empregado polos oleiros de, entre outras zonas, Bonxe e Gundivós.
A Deputada de Deseño e Artesanía aproveitou a ocasión para convidar tanto ás familias lucenses coma ós colexios de toda a provincia a traer ós mais novos a ver esta exposición, porque será unha ocasión única para que comprendan como eran as cousas antes do plástico, do vidro e da porcelana
Homenaxe ós oleiros e a García Alén
Pasado e presente da olería en Lugo inaugurarase este mércores ás 19:30 horas na Capela de Santa María, nun acto que se converterá nunha emotiva cerimonia de homenaxe ós oleiros tradicionais que aínda viven e traballan o barro. Nicanor Lombao e Manuel Iglesias, de Bonxe; Carlos Iglesias, de Samos; Agapito González, Obdulia Rodríguez e Daniel Rodríguez, de Gundivós recibirán un merecido recoñecemento coma artesáns de honra da provincia, por ser testemuñas dun saber tradicional herdado dos seus antergos e por conservarlo e transmitilo ás seguintes xeracións. Precisamente, esas novas xeracións de artesáns do barro tamén terán o seu momento durante o acto.
Durante a mesma, tamén será homenaxeado Luciano García Alén, o doutor Alén, fundador do Museo do Pobo Galego, que adicou gran parte da súa vida a estudar a olería tradicional en Galicia. Feiras, mercados e obradoiros foron algúns dos lugares ós que García Alén percorreu xunto á súa dona e ó fotógrafo e debuxante Xosé Manuel Gómez Vilasó, para recoller información acerca deste antigo oficio, que logo plasmaría en numerosas monografías e nunha monumental obra, A alfarería de Galicia, que dende o ano 1983 ata hoxe segue sendo un referente para todas aquelas persoas interesadas na cerámica producida en Galicia.
Ademais da entrega de agasallos e diplomas de recoñecemento, no acto de inauguración da mostra tamén haberá tempo para a música e a poesía. Persoeiros destacados da cultura coma Darío Xohán Cabana, Xosé Otero Canto ou Marica Campo darán lectura a poemas de Manuel María, quen sempre gadou unha intensa relación coa olería e os oleiros, mentres sona a música das cantigas de Afonso X o Sabio, en particular as cantigas número 100 e 77. Esta última é a única que fai referencia a Lugo. Serán interpretadas con pequenas caixiñas de música, réplicas en miniatura das zanfonas do século XIII, elaboradas polos artesáns do Centro de Artesanía e Deseño..
Horarios da exposición
Pasado e presente da olería en Lugo presentada hoxe abrirá as súas portas este mércores, ás 19:30 horas e permancerá aberta ata o 3 de marzo. A horario de visitas da exposición, totalmente gratuíta, será o habitual da Capela de Santa María: de luns a venres, de 10:30 a 14:00 e de 17:00 a 20:00 horas; sábados, de 17:00 a 20:00 horas, e domingos, de 11:00 a 14:00 horas.
