A Deputación colabora un ano máis coa organización da Festa da Empanada de Chantada
![](/sites/deputacionlugo.org/files/Imagenes/0_8576_1.jpg)
O Deputado de Cooperación cos Concellos, Álvaro Santos, e o Presidente da Comisión de Festas, Diego Otero Veiga, presentaron esta maña nos xardíns da Deputación unha nova edición da Festa da Empanada de Chantada, coa que colabora un ano máis a institución provincial. O evento celébrase o vindeiro martes, día 27 de agosto, no campo de San Lucas. O organismo provincial fai unha achega económica de 3.000 euros, fundamentais para esta celebración, que goza de grande aceptación e popularidade entre o público galego e, en particular, entre o lucense.
Álvaro Santos subliñou que a Deputación colabora activamente con estes eventos gastronómicos, xa que se da difusión á calidade dos produtos autóctonos, ó tempo que se lle brinda unha actividade atractiva a lucenses e visitantes. O Deputado tamén destacou que esta festa é un importante pulo á economía local, posto que se favorece a afluencia de público chegado dende diferentes puntos da xeografía lucense e galega.
Pola súa banda, Diego Otero destacou que é unha festa de tradición e cultura, que se leva celebrando dende hai moitos anos. Otero tamén quixo agradecerlle a Deputación a súa colaboración e o trato que a Comisión de Festas recibiu por parte do ente provincial.
Peche das festas patronais
A xornada da Festa será o sexto día de celebracións patronais na localidade, entre as que destaca a carreira de Motos-Plásticas, os campionatos de fútbol Trofeo Cafés Penela, o Trofeo de Chantada e o Trofeo ICOS, que serven como peche da semana grande da vila. O evento comeza o martes día 27 e o Concello de Chantada pón a disposición das persoas que se acheguen ata alí, autobuses que irán, cada 10 minutos, dende o centro da localidade ata o Campo de San Lucas, que vén de ser acondicionado recentemente polo Concello. As familias que ata alí se acheguen poderán levar a súa comida, na que non faltará o prato estrela : a empanada. Aínda que, se así o prefiren, poderán desfrutar tamén dos menús típicos das romarías, nos postos de churrasco e polbo. A sobremesa estará amenizada pola charanga Garrafón.com e polo grupo de gaiteiros Os Barrios. Pola noite, a verbena correrá da conta da Orquestra Israel, na Praza de Santa Ana.