O Goberno provincial esixe a Feijóo e Rajoy que cumpran co que lles pediron os veciños nos Orzamentos Participativos
O Goberno provincial defenderá no Pleno de mañá unha moción na que esixe a Feijóo e Rajoy que cumpran coas 65 peticións de investimentos e medidas concretas que lles fixeron os lucenses durante a elaboración dos Orzamentos Participativos da Deputación. Así o avanzaron este luns en rolda de prensa os deputados de Cooperación e Asistencia aos Concellos, Álvaro Santos, e de Economía, Recadación e Facenda, Pilar García Porto, que, xunto ao Presidente, José Ramón Gómez Besteiro, percorreron o pasado ano a provincia para coñecer as prioridades e demandas dos lucenses co fin de incorporar as que son de competencia provincial aos presupostos do organismo lugués para este 2015, e de reclamar as restantes ante as administracións que teñen as competencias.
Tanto nas xuntanzas participativas, como a través da páxina web, recibimos numerosas peticións que son competencia doutras administracións, sobre todo da Xunta de Galicia e do Goberno central, pero non por iso as deixaremos de atender. Non permitiremos que caian en saco roto, subliñou o Deputado de Cooperación. Con tal fin, o Goberno provincial levará ao Pleno ordinario convocado para mañá unha proposta con tres puntos:
- Esixir á Xunta e ao Goberno do Estado que sexan sensibles ás demandas dos cidadáns da provincia e que proxecten, financien e executen as peticións que expresaron no proceso de elaboración dos Orzamentos Participativos da Deputación
- Darlle traslado destas propostas ao Presidente do Goberno, Mariano Rajoy, e ao da Xunta, Alberto Núñez Feijóo, así como aos Concellos
- E enviar copia das peticións ao subdelegado do Goberno en Lugo, Ramón Carballo, e á delegada da Xunta na provincia, Raquel Arias.
Aínda que non teñen Orzamentos Participativos como a Deputación, queremos que Xunta e Goberno do Estado coñezan de primeira man as propostas e inquietudes dos lucenses, e que as teñan en conta e as incorporen á súa acción política, asegurou Álvaro Santos.
Trátase de 65 propostas, formuladas por veciños a título individual, ou ben por asociacións. Delas 54 son de competencia autonómica, e 11, de responsabilidade estatal.
Que piden os lucenses
Tal e como precisou o Deputado de Cooperación, entre outras cuestións, os lucenses reclámanlle á Xunta que dote canto antes ao Hospital de Lugo de Radioterapia, Medicina Nuclear e Hemodinámica as 24 horas; residencias públicas da terceira idade na comarca de Lugo, en Becerreá e en Mondoñedo; un plan urxente para poñer en valor o antigo Hospital Xeral; plans de impulso do Camiño de Santiago, e que declare oficial o Camiño de Inverno; que remate os corredores da Costa e de Monforte, o Plan Paradai de Lugo, e a Rolda Leste; e que aposte economicamente polo rural adecuando a Lei de Montes á realidade galega, potenciando a biomasa e o sector forestal, as cooperativas agrarias e gandeiras, e os produtos agroecolóxicos.
Polo que respecta ás demandas dirixidas ao Goberno de Rajoy, refírense sobre todo a infraestruturas. Os lucenses piden as autovías a Santiago e Ourense, a mellor sinalización e seguridade da A-8 ou a estación intermodal de Lugo.
Con esta moción plenaria, seguimos cumprindo os compromisos que adquirimos cos máis de 55.000 veciños da provincia que deron a súa opinión para elaborar os Orzamentos Participativos deste 2015, os primeiros dunha Deputación en España, recalcou Álvaro Santos. A iniciativa ten lugar despois de arrancar xa cos 17 primeiros proxectos provinciais froito deste proceso de participación e despois de responder a todos os lucenses que participaron no proceso, aos que contestamos punto por punto a cada unha das súas propostas de xeito argumentado, tal e como establecen as bases dos propios Orzamentos Participativos; tal e como lles prometemos dende o primeiro momento aos veciños; e tal e como esixen as prácticas democráticas. Cando un veciño se dirixe a unha administración pública, esta debe contestarlle en tempo e forma.
Unha mostra da parálise do Goberno Feijóo
Para o Goberno provincial, o feito de que teñamos recibido un número tan alto de propostas que por Lei son competencia do Goberno autonómico significa, por un lado, que a Xunta ten moito que facer en Lugo e, por outro, que os lucenses xa non identifican ao Goberno galego como unha administración que lles soluciona os seus problemas, polo que teñen que instar á Deputación a que interceda para desbloquear a parálise do Goberno de Núñez Feijóo, afirmou a Deputada de Economía.
Coa moción de mañá, engadiu, non só lle queremos facer chegar a Feijóo e Rajoy as peticións veciñais pola vía administrativa, senón que implicamos a todos os grupos políticos nestas reivindicacións para darlles máis forza, utilizando para elo a canle política da que dispoñemos e a través da que representamos aos lucenses: o Pleno da Corporación.
Esperamos que o PP por fin se comprometa
Así mesmo, a Deputada dixo confiar en que o Grupo Provincial do Partido Popular se comprometa por fin cos Orzamentos Participativos, deixe de dicir disparates sobre este proceso pioneiro de participación cidadá, e apoie esta proposta do Goberno. Esperamos que poña dunha vez os intereses dos lucenses por riba dos intereses de partido, pois, lamentablemente, nestes últimos anos, vimos día tras día como o PP se comportou na Deputación como unha mera sucursal da Xunta de Galicia, sen defender as necesidades e prioridades dos lucenses, senón as marcadas por Feijóo, asegurou.
As peticións que fixeron os veciños nos Orzamentos Participativos son peticións sen cores políticas, sen corte partidista; emanan da vontade popular dos veciños da provincia de Lugo, e merecen ser apoiadas por todos os grupos da Corporación Provincial, recalcou García Porto.
O Executivo provincial tamén confía en que, ao igual que a Deputación estudou tecnicamente e contestou a todas e cada unha das propostas veciñais, a Xunta e o Estado fagan o mesmo, e nos remitan una contestación argumentada para, á súa vez, facerlla chegar aos veciños e asociacións que as plantexaron.
