O Centro de Artesanía e Deseño oferta un curso
sobre construción de hórreos
Esta semana desenvolverase no centro de cestería do río Rato o cuarto curso da programación de cestería de primavera do Centro de Artesanía da Deputación de Lugo. Desde o luns ata o venres 25 de abril o asistentes, ademais de profundizar na identificación de materiais e ferramentas, aprenderán a construír hórreos seguindo os pasos necesarios. Neste senso, nun primeiro momento comezarán pola preparación da base formada por un marco de madeira para logo seguir coa fabricación do corpo, co ensamble da estrutura do teito e, finalmente, co tellado que se elabora con palla de centeo. O artesán Carlos Fontales imparte este obradoiro que se desenvolve, en horario de mañá de 10:00 a 14:00, e de 16:00 a 20:00 horas pola tarde. Está dirixido a cesteiros profesionais, artesáns doutras disciplinas e ó público en xeral. Dispón de 40 horas de formación e unha capacidade para 8 alumnos. Este curso inclúese dentro da programación de primavera do CENTRAD formada por 10 cursos diferentes nos que os asistentes coñecerán distintas técnicas de cestería, e nas que se empregan materiais como o vimbio, a palla, a silva ou o esparto. Obradoiros portátiles Os obradoiros portátiles de tapiz, cestería e instrumentos continúan esta semana nos colexios da provincia. Os alumnos de Primaria e Secundaria están a ser os destinatarios desta iniciativa que busca recuperar os oficios artesanais desde a etapa escolar dándolles ós rapaces a oportunidade de aprender e coñecer oficios de grande tradición na provincia. Neste senso, os alumnos dos colexios nº 1 de Foz e Fondo Nois de Fazouro descubrirán as principais técnicas de cestería. No primeiro caso, o obradoiro comeza o luns ata o xoves 24 e, no segundo, ata o mércores 23. Pola súa banda, os escolares dos CEIPs de Xermade e do Landro de Viveiro terá a oportunidade de aprender a coñecer como se fabrican os instrumentos musicais. Esta actividade desenvolverase desde o 22 ata o 24 e desde o 25 ó 26 de abril respectivamente. Asimesmo, a modaliade de tapiz impartirase no CEIP Virxe da Soidade de Lugo desde o luns ata o xoves, 24 de abril. A vindeira semana será a quenda dos alumnos do CEIP Juan Rei de Lourenzá e do colexio Galén de Lugo.
