O Presidente da Deputación portou en Barcelona a figura do San Froilán elaborada polo Centro de Artesanía e Deseño
Rematan hoxe na Cidade Condal os festexos iniciados polos empresarios lucenses hai 15 anos e que están considerados os máis importantes despois da Merced O Presidente da Deputación, José Ramón Gómez Besteiro, levou na procesión que tivo lugar esta mañá polas rúas de Nou Barris a figura do San Froilán elaborada polo Centro de Artesanía e Deseño (CENTRAD), dependente da Deputación de Lugo. A comunidade galega residente na Cidade Condal fixera hai un ano unha petición a Gómez Besteiro para que o CENTRAD deseñase esta talla do Santo ó que están adicadas estas festas patronais. Miles de persoas visitaron durante o día de onte o stand turístico da Deputación de Lugo onde estivo exposto ó público o Santo, que foi moi fotografiado e bicado. Cada ano, as festas xa coñecidas como o San Froilán catalán están a suscitar o interese de máis xente. Segundo datos da Gada urbana, máis de 55.000 persoas pasaron pola praza maior de Nou Barris nesta fin de semana. Este barrio é ademais o lugar de residencia por excelencia dos galegos afincados en Barcelona, xa que suman preto de 150.000, aínda que en toda a cidade xa se contabilizan máis de 300.000 censados. O San Froilán catalán está a ser todo un acontecemento. Están consideradas as segundas festas máis importantes de Barcelona, despois da Merced, por iso todos os anos acuden personalidades da vida política, cultural e social catalana. Son ademais unhas festas privilexiadas na cidade, xa que teñen permiso das autoridades para que se poidan celebrar no propio barrio, modificando notablemente o ritmo diario, e contan co apoio económico do concello de Barcelona. Iso amosa, segundo Gómez besteiro, a importancia e o apoio que o goberno barcelonés lle dá á comunidade galega e, sobre todo, á lucense. Os festexos teñen lugar desde hai 15 anos cando un grupo de empresarios lucenses quixeron traer o espíritu lucense ata Barcelona. Desde entón, esta festa recupera o tradicional estilo popular con música galega, casetas de polbo, sesión vermú ou a procesión do domingo.