A Deputación concede a súa Medalla de Ouro
ó diario El Progreso
![](/sites/deputacionlugo.org/files/Imagenes/0_3899_1.jpg)
O Pleno deste martes aprobou por unanimidade, e a proposta do Presidente da Deputación, José Ramón Gómez Besteiro, a concesión da Medalla de Ouro da Provincia de Lugo ó diario El Progreso tendo en conta a celebración do seu centenario e en recoñecemento ó seu dilatado e meritorio labor en beneficio dos intereses xerais da provincia de Lugo. A proposta da Presidencia o Pleno tamén aprobou co apoio de todos os grupos políticos o acondicionamento dunha zona verde baixo a denominación de O Bosque do Centenario, na zona do río Rato-Fervedoira que é propiedade da institución provincial, deseñado para o ocio de todos os veciños e veciñas desta provincia e baixo o prisma de proxección de continuidade no futuro. Esta actuación singular responde ás novas políticas da Deputación Provincial que teñen como prioridade poñer en valor o noso patrimonio natural, único no mundo e avalado por especies protexidas de enorme variedade e riqueza paisaxística. Vincúlase tamén ó ambicioso programa Lug02, posto en marcha pola Deputación de Lugo co respaldo da Unión Europea, e que empeza a executarse cunha máxima: o desenvolvemento dos municipios que conforman as Reservas da Biosfera. En virtude deste acordo, a Deputación prantará 101 árbores de especies autóctonas nun espazo medioambiental privilexiado que ademais se asenta no corazón da Reserva da Biosfera Terras do Miño, é dicir, nunha das áreas medioambientais máis valiosas de cantas existen en Europa. As 101 árbores simbolizarán cada un dos anos cumpridos por El Progreso, enraizados na sociedade lucense e unidos con ela xa para sempre. A última árbore, a 101, representa os desexos de continuidade e prosperidade que esta Corporación Provincial lle quere expresar a El Progreso de cara ós anos futuros, para que siga brotando coa mesma paixón por Lugo que o caracterizou nos últimos cen. O Bosque do Centenario reflectirá os valores de El Progreso, unha empresa lucense que soubo consolidarse co paso dos anos, afrontou con decisión os retos dos novos tempos e estendeu seus lazos a toda a sociedade, tal e como simbolizan as ramas da árbore do logotipo que El Progreso deseñou para o seu Centenario, e que identicamente farán as das 101 árbores plantadas. Para acondicionar con todas as garantías este espazo natural, a Deputación Provincial obterá os permisos necesarios da Confederación Hidrográfica do Miño-Sil, xa que no planeamento urbanístico actual do Concello de Lugo a zona do río Rato-Fervedoira está declarada SNU-4 (Solo Especial de Protección de Cuncas). Unha vez aprobado este acordo a Deputación Provincial fará partícipe do mesmo ó Concello de Lugo co fin de que así o recolla na planificación do seu desenvolvemento e poda asegurarlle unha especial protección de cara ó futuro.