O programa de visitas Km0 chega ós centros educativos da provincia
Gómez Besteiro destaca ante os rapaces a importancia do medio ambiente e a súa conservación. O programa de visitas institucionais e medioambientais Km0 chega ós centros educativos da provincia. Alumnos de 10 e 11 anos do colexio A Nosa Señora da Asunción de Sarria son os primeiros en participar nesta iniciativa, da que xa disfrutaron máis de 1.500 persoas, e que ten por obxectivo dar a coñecer tanto o traballo que está a realizar a institución como a riqueza patrimonial e paisaxística de nosa provincia. Nesta primeira tempada de Km0 tamén están inscritos alumnos doutros nove centros educativos da provincia: os CEIP Rosalía de Castro, Meira, Castroverde, San Xoán de Becerreá, Taboada e Bretoña, os colexios María Auxiliadora e Divino Maestro e o IES de Quiroga. O Presidente da Deputación, José Ramón Gómez Besteiro, recibiu este martes no Salón de Actos a 25 alumnos de 5º de Primaria e a dous mestres do Colexio da Asunción de Sarria. Gómez Besteiro destacou ante os rapaces a importancia que ten o medio ambiente na nosa provincia, polo que é necesario que o coidemos entre todos. Subliñou que 5.500 quilómetros cadrados, dos 10.000 que ten a provincia, son Reserva da Biosfera, uns espazos que hai que protexer. Todos os nenos, que se amosaron moi participativos e que ó remate da recepción recibiron cadansúa lambetada, estaban por primeira vez na sede da Deputación, algo que foi destacado polo máximo responsable provincial. Pola súa banda, os rapaces amosaron a súa satisfacción por ser os primeiros alumnos en participar en Km0. Das 88 rutas incluídas en Km0, o colexio de Sarria elexiu a da Vía Romana XIX. Antes da recepción, coñeceron a Ínsua de Burneiros e a Casa Grande da Fervenza e despois desprazáronse ata Pedrafita. Neste Concello da Montaña visitaron a fábrica de queixos do Cebreiro, percorreron a pé un treito da Vía Romana XIX ata Xestoso e visitaron o Castelo de Doiras. Mañá participará en Km0 un segundo grupo de alumnos do colexio A Nosa Señora da Asunción, que farán o mesmo percorrido que os seus compañeiros. Polo que se refire ó xoves, un grupo de 55 solicitantes individuais visitarán o Centro de Artesanía e Deseño, a fábrica de cerámica de Sargadelos e o Real Padroado e farán un percorrido polo paseo dos Namorados, no Concello de Cervo.
