080411 Nominados ós Mestre Mateo comparten experiencias cos alumnos da Escola de Imaxe e Son de Lugo
O alumnado da Escola de Imaxe e Son de Lugo, dependente da Deputación, participou este venres no programa Encontros, organizado pola Academia Galega do Audiovisual como preámbulo á gala de entrega dos Premios Mestre Mateo 2010. A iniciativa ten como obxectivo achegar os traballos e profesionais do sector audiovisual ós estudantes das escolas de imaxe e comunicación existentes na comunidade galega mediante a exhibición de producións que optan ós Mestre Mateo e da organización de mesas redondas nas que participan integrantes deses traballos de cine e televisión. O ciclo desenvolveuse dende principios desta semana en Ourense, Santiago, Vigo e A Coruña, e pechouse hoxe na capital lucense.
No caso do encontro de Lugo, celebrado esta mañá no salón de actos do organismo provincial, participaron como poñentes os nominados na categoría de realizadores: Manuel A. Espiñeira, pola serie Padre Casares; Txabi Mira e Miguel Corujo, por Spot Turgalicia, e X.A. Moure, por Hai que mollarse. Estes catro profesionais compartiron as súas experiencias e coñecementos cos alumnos da Escola de Imaxe e Son, que depende da Fundación TIC e é a única deste tipo na provincia. O funcionamento da escola, cuxa matrícula é ademais gratuíta, evita que os mozos que desexan formarse nesta especialidade profesional se vaian fóra.
A Academia Galega do Audiovisual entrega cada ano, dende o 2002, os Premios Mestre Mateo co fin de fomentar o cine e a televisión, incluíndo a publicidade, que se realiza en Galicia. O certame, que chega á súa novena edición, toma o nome do autor da maior parte do Pórtico da Gloria da Catedral de Santiago. Os gañadores deste ano coñeceranse na gala que se celebrará no Auditorio Municipal de Ourense o próximo 17 de abril e que estará conducida polo popular actor Xosé Antonio Touriñán e a xornalista Belén Regueira.
