A Deputación mellora a estrada de Castro de Rei á Pastoriza que beneficia a máis de 10.000 veciños
O Presidente da Deputación, José Ramón Gómez Besteiro, e o Alcalde de Castro de Rei, Francisco Balado Teijeiro, supervisaron este mércores as obras que executou o organismo provincial entre os puntos quilométricos 3,200 e 7,330 da CP 1106, o treito comprendido entre o cruce de Xesto, por Pacios ata Reigosa. Trátase das últimas actuacións que vén de executar a institución luguesa en dita estrada provincial logo de realizar con anterioridade os traballos de acondicionamento entre os puntos quilométricos 0,000 e 3,200, así como dende o 7,330 ó 9,420. En total, a Deputación investiu 500.000 euros na mellora con aglomerado en quente de case 10 quilómetros desta vía que comunica ós municipios de Castro de Rei e A Pastoriza, e que transitan os máis de 10.000 habitantes que concentran ambos os dous Concellos da Terra Chá. Ademais, a institución cumpriu cun outro dos obxectivos do equipo de goberno: a creación de emprego xa que, só coas obras realizadas nesta estrada, mantivéronse 20 postos de traballo.
O Alcalde destacou que teño que recoñecer que a Deputación está a cumplir co Concello de Castro de Rei no que atinxe a rede viaria provincial, ó igual que con outros proxectos como o Centro de Recría que esperamos que sexa o futuro do sector gandeiro da Terra Cha. A este respecto, Gómez Besteiro salientou que é bo que as institucións recoñezan que con este proxecto gana toda Galicia e reiterou que é preciso que se sumen todas as administracións porque a súa posta en marcha suporá beneficios para todos os veciños ó afectar directamente no PIB da Comunidade.
Precisamente, co fin de continuar coa relación de colaboración entre Deputación e Concello de Castro de Rei que fixo posible nos últimos anos impulsar proxectos de grande envergadura para o desenvolmento socioeconómico da zona como o inicio das obras de construción do 1º centro de recría público de gando en España na Granxa Gayoso Castro, traballos nos que o organismo provincial, malia non ter as competencias en medio rural, inviste en solitario 12 millóns de euros, Besteiro e Balado aproveitaron o seu encontro para abordar as necesidades do municipio chairego.
Mellora do 80% das vías provincias
A execución dos traballos na CP 1106 era un compromiso adquirido cos veciños polo anterior Rexedor e actual Deputado de Cooperación cos Concellos, Juan José Díaz Valiño, que acompañou a Gómez Besteiro e a Balado Teijeiro durante a visita. Estas actuacións engádense, ademais, ás realizadas noutras 7 estradas provinciais: de Castro de Rei a Reguntille; de Ponte de Outeiro a Quintela; de Couto de A, por Ansemar, a Castro Riberas de Lea e acceso a Castro de Viladonga; de Xustás a Bazar; de Feira do Monte a Castro; da LU-113 a Castro de Rei; e do acceso ó polígono industrial a Castro Riberas de Lea. Son melloras con aglomerado en quente dotadas de 3,2 millóns de euros que investiu a Deputación durante o anterior mandato cando Díaz Valiño estivo á fronte da Delegación da Rede Viaria Provincial. O Presidente subliñou que melloramos preto do 80% das vías provinciais do Concello de Castro de Rei. Como fixemos ata o de agora, ano tras ano iremos incrementando os treitos con aglomerado en quente porque así, garantimos a seguridade dos viandantes e o mantemento dos propios viais durante máis tempo.
Colaboración coas mulleres rurais
Gómez Besteiro mantivo, ademais, unha reunión con membros da Xuntanza que, con 300 persoas, é a maior asociación de mulleres rurais da provincia. A institución colabora con este colectivo no impulso da súa múltiple actividade. Mostra delo son as últimas actuacións que desenvolveu a Deputación e das que deu conta o titular provincial:
- Acondicionamento do exterior e dotación de calefacción da antiga escola da Ponte de Outeiro, local social desta asociación onde, precisamente, tivo lugar o encontro. A Deputación concedeu unha subvención de 6.500 euros para estes traballos, enmarcados dentro do Plan de Comunidades Veciñais de 2011.
- Traída de augas e mellora dos accesos en 7 explotacións agrarias das Mulleres Rurais. Neste caso, a axuda concedida, incluída nas subvencións do INLUDES para apoiar ó sector primario, foi de 6.000 euros.
- Celebración de obradoiros de cestería e téxtil impartido polos profesionais do Centro de Artesanía e Deseño (CENTRAD) de xeito totalmente gratuíto na antiga escola da Ponte de Outeiro, en Castro de Rei.