Os traballadores da Deputación protestan contra os novos recortes do Goberno cunha concentración espontánea diante de San Marcos
Os traballadores da Deputación de Lugo concentráronse este mércores diante do Pazo de San Marcos en protesta contra o novo paquete de recortes anunciado esta mañá polo Goberno Central. Os propios empregados do organismo provincial decidiron de xeito totalmente espontáneo convocar a mobilización tras coñecer unhas medidas que reducen e lesionan os dereitos laborais consolidados polos traballadores ó longo de moitos anos.
Coa concentración, o persoal da Deputación quixo expresar o seu rexeitamento contra medidas lesivas como a subida do IVE, do 18 ó 21% o tipo xeral e do 8 ó 10%, o reducido; a rebaixa da contía da percepción por desemprego en 10 puntos a partir do sexto mes no paro; ou a racionalización do gasto no sistema de dependencia, así como contra a perda de dereitos dos empregados públicos, como a supresión da paga extra de Nadal e de parte dos días de libre disposición.
