Deputación e Concello impulsan a venda de produtos autóctonos na X Festa da Cereixa e do Aceite de San Clodio de Ribas de Sil
A Deputada de Economía, Recadación e Facenda, Pilar García Porto, o Alcalde de Ribas de Sil, Miguel Ángel Sotuela, e o Concelleiro de Servizos Xerais e Modernización Administrativa, Francisco Fraga, presentaron este martes a décima edición da Festa do Aceite e da Cereixa de San Clodio, que se celebrará a vindeira fin de semana na praia fluvial de San Clodio, en dito municipio da Ribeira Sacra. Este ano a colleita é abundante e de alta calidade, polo que se agarda que se superen os preto de 13.000 euros de volume de negocio acadados en anos anteriores só coa venda de cereixa e aceite, cultivos ós que o municipio de Ribas de Sil adica preto de 500 hectáreas, o que supón máis do 80% da súa superficie forestal en uso no municipio.
García Porto subliñou a importancia de colaborar con este tipo de eventos, xa que a promoción dos produtos autóctonos a través deste tipo de iniciativas, capaces de atraer a miles de visitantes ano tras ano supón un importante atractivo económico para os Concellos, que vén como repercute positivamente na súa economía, impulsando non só os produtos autóctonos, senón tamén ó sector da hostalería, do comercio ou da artesanía local. O potencial económico para a produción agrícola do municipio, que adica preto de 500 hectáreas a estes cultivos- o 80% da superficie forestal en uso-, ó cultivo de árbores froiteiras.
En vista da importancia acadada por esta festa e tras cumprir os dez anos de historia, o Alcalde destacou que o Concello vai iniciar os trámites para acadar a declaración de Interese Turístico de Galicia, que suporá un novo recoñecemento a esta cita que xa conta co favor de miles de visitantes que se achegan todos os anos a San Clodio. Sotuela quixo destacar tamén a calidade desta froita e o intenso sabor do aceite, cualidades potenciadas pola climatoloxía propia da zona. Cunha produción anual dunhas 50 toneladas, a cereixa de Ribas de Sil está amparada polo rexistro de marcas e patentes, ó igual que o aceite, requisito imprescindible para acadar a futura denominación de orixe. No acto de presentación, que tivo lugar nun posto do mercado da Praza de Abastos, o público asistente puido comprobar o excelente sabor das sonadas cereixas coa degustación dalgunha das moitas variedades desta froita que se cultivan no Concello.
2.000 quilos de cereixa e 250 litros de aceite
O Concello ten habilitados 23 stands no recinto feiral, cinco dos cales estarán ocupados por produtores de cereixa e aceite ribasilenses que porán á venda arredor de 2 toneladas de cereixa, a prezos de entre 3 e 4 euros, e uns 250 litros de aceite, que se poderán mercar en botellas de cuarto ou tres cuartos de litro, oscilando o seu prezo entre os 6 e os 15 euros. Xunto a eles estarán outros 18 produtores que ocuparán os stands habilitados polo Concello para produtores da comarca e nos que os visitantes poderán mercar o viño elaborado por tres bodegas da comarca, mel, licores, castañas e derivados, doces, e outra das delicias gastronómicas que ofrece Ribas de Sil, os figos secos.
A cita comezará oficialmente o sábado 9 ás 21:00 horas coa lectura do pregón a cargo do Alcalde lucense, José López Orozco, aínda que os actos iniciaranse xa pola mañá coa apertura do recinto feiral e a animación a cargo de pasarrúas. Un ano máis, tamén haberá competicións deportivas e diferentes actuacións musicais ata o domingo pola noite, cando a feira pechará as súas portas.