A Deputación de Lugo impulsa un ano máis a mellor artesanía da provincia coa XVI edición do Artesanfroilán
A Deputada de Deseño e Artesanía, Regina Polín, acompañada por algúns dos artesáns que estarán presentes na mostra, presentou hoxe a XVI edición do Artesanfroilán, a tradicional mostra de artesanía que un ano máis a Deputación de Lugo pón en marcha na cidade coincidindo coas festas do San Froilán. Esta iniciativa cumpre cun dobre obxectivo: por unha banda, contribúe a potenciar unhas festas que repercuten moi positivamente na economía local, polo gran impulso que supoñen para todos os sectores da economía local debido á grande afluencia de visitantes que durante eses días consumen na cidade e nas localidades limítrofes.
Por outra, Artesanfroilán desempeña un papel fundamental para dar a coñecer o sector da artesanía da provincia de cara ó exterior, precisamente por esa afluencia de visitantes procedentes de toda España e mesmo do estranxeiro, atraídos por unhas festas declaradas de Interese Turístico Nacional. Neste sentido, Regina Polín destacou que o San Froilán é unha ocasión inmellorable para promocionar a riqueza da provincia e impulsar a nosa economía. Hoxe en día é fundamental apoiar iniciativas altamente rendibles coma estas festas, posto que veñen deixando beneficios de máis de 15 millóns de euros ano tras ano. Temos que convencernos de que este tipo de celebracións non son un gasto, senón unha inversión
Unha das mostras de máis sona
Artesanfroilán está consolidada coma unha das mostras do sector máis destacadas e con máis nome en toda España, especialmente nos últimos catro anos, debido ós beneficios acadados polos profesionais presentes. Esta feira supón un inmellorable escaparate para o sector da artesanía, ó ser visitada cada ano por milleiros de persoas e que contribúen a facer desta mostra unha das máis baratas e rendibles do sector: a cambio dunha aportación de 360 euros que ten que facer cada artesán para dispoñer dun posto habilitado na carpa (unha terceira parte do que pagan noutras mostras similares), conseguen estar presentes nunha feira que vén xerando un volume de negocio de máis de 100.000 euros cada ano.
É, polo tanto, unha ocasión inmellorable para dar conta da riqueza artesanal de Galicia e promocionala de cara ó exterior, algo do que os profesionais do sector son prefectamente conscientes, tal e como amosan as preto de 70 solicitudes achegadas por profesionais de toda España.
25 destacados artesáns
No Artesanfroilán estarán presentes moitos dos profesionais máis destacados de toda a xeografía galega, seleccionados seguindo os criterios sinalados nas bases feitas públicas o pasado mes de agosto. Tal e como sinalou a Deputada responsable da Área, ademais da calidade dos traballos tivéronse en conta criterios coma o da a sostenibilidade e a innovación amosadas no proceso produtivo ou o repecto polo medio ambiente, exemplificado no emprego de materiais e substancias de orixe natural, ou que estivesen representadas a maior variedade de técnicas posible. Así mesmo, primouse a procedencia lucense dos artesáns, quedando reservado o 80% dos stands para estes, malia que os profesionais de fóra de Galicia ou doutros países coma Portugal tamén teñen cabida nesta mostra.
Así, estarán presente un total de 25 artesáns de diferentes orixes. 19 deles proceden dos Concellos de Lugo (7), Viveiro (4), Ribadeo (2), Vilalba (1), Monforte (1), Mondoñedo (1), Courel (1) e Cervo (1). Os seis restantes veñen das provincias da Coruña (3), Pontevedra (2) e Valladolid (1).
Nos stands habilitados dos que disporán estes profesionais no Artesanfroilán, os visitantes poderán mercar a bo prezo pezas de xoiería e bisutería, cerámica, téxtil en lá e encaixe, coiro, elementos decorativos e xoguetes realizados en madeira, pintura, variados complementos de vestir en diferentes materiais, zapatos ou decoración en vidro e flor.
Coma todos os anos, os artesáns participantes optarán a un premio de 1.000 euros en metálico para o mellor expositor. Para elo, teranse en conta factores coma o deseño do stand, a presentación orixinal do produto e o esforzo por mellorar a calidade da feira.
Coma novidade deste ano, haberá un stand máis, no que 8 artesáns de sobrado prestixio exporán outras tantas particulares visións das festas do San Froilán, a través de creacións en pedra, madeira, ferro, téxtil ou materias de reciclaxe.
Días e horarios de apertura
Coma vén sendo habitual, Artesanfroilán abrirá as súas portas na carpa instalada na Praza de Anxo Fernández Gómez, situada tras a Casa do Concello lucense, o día 5, en horario de 11:00 a 14:30 horas e de 17:00 a 21:30 horas, agás o día 12 no que pechará ás 21:00 horas. A entrada é totalmente gratuíta.