Deputación de Lugo

A Deputación entrega ó Alcalde de Guitiriz o proxecto do centro de día e residencia pública para que aclare dunha vez a súa postura

Fíxoo na reunión convocada para definir a postura oficial do Rexedor sobre esta iniciativa logo de que Teixido a rexeitase publicamente en varias ocasiónsTras non esclarecer a súa postura, asegurando “non ter idea das necesidades dos veciños ata estudar o proxecto da Deputación” que nunca pedira, o organismo provincial entregoulle ó Alcalde unha copiaMalia que o Rexedor está a avaliar a construción doutras residencias, neste caso privadas e coa colaboración de Concello e Xunta, a institución provincial emprazouno a un novo encontro o 14 de decembro para desbloquear a construción do centro público para maiores da Deputación

SUPLUSA celebrou este luns unha nova comisión de seguimento e impulso da rede pública de centros de día e residencias que constrúe a Deputación na provincia, na que se abordou, como tema central da Orde do Día, a realización desta dotación social en Guitiriz. O motivo deste encontro foi coñecer a postura oficial do Alcalde do municipio sobre este proxecto social, logo de que este non se dirixirse en ningún momento ó organismo provincial para avalialo, malia rexeitalo publicamente en reiteradas ocasións. Xosé María Teixido non aclarou a súa postura, asegurando “non ter idea das necesidades dos veciños de Guitiriz ata estudar a iniciativa da Deputación”, cuestión que aínda non realizou tras máis de ano e medio á fronte deste municipio. Ante esta situación, o organismo provincial entregou ó Rexedor o proxecto do centro de día e residencia que nunca pedira, emprazándoo a un nova reunión o vindeiro 14 de decembro para esclarecer dunha vez por todas esta situación.

E é que o Alcalde está a bloquear a construción do centro público para maiores en Guitiriz non só por non esclarecer o seu parecer ó respecto, senón porque tamén mantén paralizada a cesión dos terreos necesarios para a súa realización a pesar de que esta cuestión foi aprobada polo Pleno municipal. Trátase da Casa da Botica e das fincas colindantes a este inmoble onde a Deputación contempla un centro de día con 15 prazas e unha residencia con 26. Neste senso, Teixido informou hoxe que os técnicos municipais realizaron, sen coñecer nin avaliar previamente o proxecto de centro de día e residencia pública da Deputación, un informe que conclúe que este afincamento non é o axeitado. A institución provincial non recibiu esta documentación para poder estudala.

Centro Público

A Deputación reiteroulle ó Rexedor a súa disposición para construír un centro público para maiores en Guitiriz, asumindo o 80% do custes destes traballos, é dicir, 2,1 millóns de euros. Pola súa banda, o Concello só tería que achegar os terreos, os servizos urbanísticos e participar no financiamento con 200.000 euros. Deste xeito, Deputación e Concello posibilitaría en Guitiriz a oferta de prazas tanto nun centro de día coma nunha residencia a un prezo máis vantaxoso ó impulsar unha instalación de caracter público. Todo isto, a pesares de non contar coa colaboración da Xunta, administración galega con plenas competencias que rexeitou sumarse a este proxecto, xustificando que “non é necesario nin prioritario”. Á espera de coñecer a postura oficial do Alcalde, Teixido asegurou hoxe estar pendente da construción neste municipio de residencias privadas coas que, neste caso, si colaboraría tanto Concello de Guitiriz como Xunta de Galicia.

Últimas Novas