Éxito da primeira retransmisión en 'streaming' do VI Campionato Internacional de Baristas de Foz
Máis de 450 persoas seguiron está mañá en directo a través dos seus dispositivos móbiles a evolución do VI Campionato Internacional de Baristas que acolle estes días a Escola de Hostalería de Foz e que a Fundación TIC, dependente da Deputación, difunde a través da súa páxina web, www.fundaciontic.org, por 1ª vez en streaming - tempo real-, grazas ó traballo dos alumnos de 2º curso do Ciclo Superior de Realización da Escola de Imaxe e Son (EIS). Ademais, todo o material audiovisual obtido empregarase para a edición dun DVD, que se entregará posteriormente ó IES de Foz.
O Presidente da Deputación, José Ramón Gómez Besteiro, que fixo entrega hoxe dos trofeos ós vencedores deste VI Campionato Internacional, subliñou a importancia do labor dos responsables da Escola por organizar este evento, que contribúe a promocionar unha especialidade profesional, unha alternativa que aumenta as posibilidades de inserción laboral nun sector estratéxico na Mariña, comarca na que preto do 70% das empresas adícanse ó sector servizos. Ademais, quixo destacar o feito de que estes Campionatos sexan unha oportunidade de facer prácticas reais, fundamentais para aumentar as posibilidades de inserción no mercado laboral, tanto para o alumnos desta Escola coma para os da Escola de Imaxe e Son, que están a retransmitir en directo todo o que aquí acontece.
Esta entrega de trofeos tivo lugar tras unha demostración de latte art - arte de preparar orixinais deseños na superficie do café-, a cargo do gañador dos Campionatos Galego e Nacional de Baristas, o chantandino Damián Seijas. Seguidamente, os asistentes puideron degustar un xantar elaborado polos propios alumnos da escola focense.
Competición de baristas profesionais
As probas continuarán mañá coa celebración da final do I Campionato Internacional de Baristas Profesionais, e outras actividades programadas, coma a demostración de coctelería acrobática que fará o subcampión galego Carlos Abelleira e as degustacións de café. Todas as actividades tamén serán retransmitidas en streaming na páxina web da Fundación TIC.
A colaboración entre a TIC e o instituto de Foz é froito dun convenio entre ambas entidades, que ten como finalidade promocionar no exterior as ensinanzas de hostalería que se imparten no IES mariñano, ó tempo que os estudantes do único centro da provincia que imparte ensinanzas superior da familia do audiovisual completan a súa formación. A gravación forma parte da programación de prácticas reais da Escola de Imaxe e Son de Lugo, para as que os alumnos dispoñen dos medios técnicos necesarios para desenvolver un traballo profesional que contribúa á súa inserción laboral.
