A Deputación organiza o primeiro Encontro de Cociña Solar na provincia
A Deputación de Lugo, dentro da súa aposta polo medioambiente para xerar riqueza de xeito sostible na provincia, ofrece este xoves na Praza de San Marcos o primeiro Encontro de Cociña Solar na provincia, converténdose na primeira institución pública en Galicia que apoia unha iniciativa destas características. O Deputado de Cooperación e Asistencia ós Concellos, Álvaro Santos, e o director de Ouvirmos, Xosé M. Aldea, presentaron este martes esta novidosa actividade, totalmente gratuíta para os participantes, ó estar financiada con 1.800 euros polo organismo provincial.
Álvaro Santos destacou que este proxecto busca dar solución ós problemas medioambientais que se están a producir debido ó alto consumo enerxético, fomentando así o uso das enerxías renovables. O Deputado salientou que esta iniciativa, a parte de ser orixinal, goza dunha gran aceptación en países que posúen fortes políticas medioambientais, que buscan solucións enerxéticas limpas. Debemos por os nosos ollos neses países e crear políticas e actividades que fomenten o respecto ó medio que nos rodea. Xosé Aldea, tamén valorou que este tipo de cociñas esta sendo patrocinadas e promocionadas por organismos como a ONU e por un grande número ONG para suplir as carencias enerxéticas en países en desenvolvemento posto que a eficacia e moi alta e o seu custe e moi escaso
Programación do Encontro
A actividade da Cociña Solar que propón a Deputación de Lugo da comezo ás 16:00 horas cun obradoiro no que se fará unha demostración para aprender como se constrúe unha cociña deste tipo, con custes moi baixos e que ten unha elevada eficacia. Para esta actividade, o número de prazas é limitado, sendo 20 as persoas que poderán participar no obradoiro. Ó remate desta actividade, comezará a exposición pública dos fornos solares, que dará conta do seu funcionamento. Para as inscricións, máis información en www.deputacionlugo.com ou no teléfono 982 22 78 12.
Experto de Portugal
Ás 20:00 horas, dará comezo unha conferencia sobre os tipos de cociña solar que existen. A charla vai a cargo do Enxeñeiro e Profesor do Instituto Superior de Engenharia da Universidade do Algarve en Portugal, Celestino Rodrigues Ruivo. O Profesor é unha das máximas autoridades no campo da cociña solar no país luso. Dende 2006 ven promocionando esta tecnoloxía, a través de actividades en diferentes rexións de Portugal, así como en España ou Brasil.
