A Deputación apoia a artesanía da comarca e colabora un ano máis na Feira Artesán e Gastronómica de Castroverde
A Vicepresidenta Segunda da Deputación, Lara Méndez, e a Concelleira de Cultura e Deportes da Vila de Castroverde, Pilar Ferreiro, presentaron nos xardíns da Deputación a VIII Edición da Feira Artesán e Gastronómica da vila lucense de Castroverde e que se celebrará o vindeiro domingo día 18 de agosto. A iniciativa, que goza de grande aceptación entre os veciños e veciñas, pretende impulsar a artesanía e a gastronomía como motores claves no desenrolo económico da comarca e especialmente no concello de Castroverde. O organismo provincial fai unha achega de 3.000 euros xa que, como dixo Lara Méndez a Feira promociona o sector artesanal e gastronómico e activa en certa medida a economía local. Méndez valorou tamén moi positivamente a labor dos artesáns que están reinventando os seus materiais e productos para facelos máis accesibles ós clientes e que isto axuda a fomentar a actividade comercial, non só na Feira senón tamén no concello e na contorna. Pilar Ferreiro agradeceu a colaboración do organismo provincial e afirmou que cada ano intentan variar o programa para que o público asistente poida encontrar cousas diferentes ás edicións pasadas
Programación da Xornada
A Feira abre as súas portas as 10:00 horas da maña con aproximadamente 100 expositores. As 11:00 horas poderase desfrutar de obradoiros de olaría, cestaría e incluso de instrumentos musicais. Cara o mediodía o grupo Zuncurundullo amenizará a xornada coa súa música. De seguido haberá unha degustación de Queixo do Cebreiro, catalogado coa Denominación de Orixe Protexida e que ofrece Marqués de Cernadas. Tamén haberá unha cata de viños da man da Adega Mondelo. Posteriormente hai organizado un desfile de moda a cargo de María Nogueira e que presentará a actriz e cantante lucense Alba Messa. Cara as 14:00 horas terá lugar o pregón, da man de Facundo, co que quedará a Feira inaugurada oficialmente. Ás 14:30 horas será o xantar galego a base de productos típicos como polbo á feira. Pola tarde haberá inchables para os máis cativos, unha xuntanza de cabalos, na que haberá ata 1.000 euros en premios e incluso unha actuación de maxia a cargo do mago Antón. O evento finaliza ás 20:45 cunha demostración de baile da man do grupo Ritmo Lugo.
