Martínez: 'outra vez o PP chega tarde; a Deputación xa está solucionando as súas chapuzas na Fonsagrada'
O Deputado de Xestión Territorial, Manuel Martínez, subliñou este martes que outra vez o Partido Popular chega tarde; a Deputación xa está a solucionar as súas chapuzas na Fonsagrada, facendo referencia, deste xeito, ás reclamacións para o arranxo da LU-P-1901 e LU-P-1910, que o PP deixou en estado tercermundista.
Martínez subliñou a pouca vergoña dos populares, cando enganaron ós veciños, prometendo a mellora da LU-P-1901, que enlaza A Fonsagrada con Navia de Suarna, co famoso plan dos 50 millóns de euros, que nunca executaron porque non contaban con cartos nin terreos. En contraposición, destacou o Deputado, este Goberno Provincial inviste 250.000 euros nas expropiacións, pendentes de resolución, dende hai máis dun ano, por parte da Xunta. O PP da Fonsagrada debería esixir ós seus compañeiros no Goberno galego que axilicen este proceso e que, dunha vez por todas, se impliquen coa Montaña luguesa. Sen embargo, non o fan, e adícanse a facer reclamacións a outras administracións, cando non son capaces de que Feijóo traia un só euro para a provincia.
A institución luguesa está á espera, dende abril do 2012, de que o Xurado de Expropiacións, departamento da Conselleira de Infraestruturas, Territorio e Medio Ambiente da Xunta de Galicia, resolva o proceso de expropiacións, para o que a Deputación ten reservado 250.000 euros, á espera do xustiprezo. Unha vez liquidado este proceso, obrigatorio por lei, o organismo provincial poderá iniciar a execución do proxecto de mellora desta vía, que xa ten redactado. No caso da LU-P-1910, que conecta a Fonsagrada con Asturias, estase a tramitar a cesión dos terreos necesarios para o ensanche desta estrada.
Esforzo inversor
O Deputado salientou o esforzo inversor deste Goberno Provincial por mellorar as comunicacións viarias na Montaña, que o PP deixou intransitables e con grava, lembrando o aglomerado das vía de Acebo a Negueira, no que a institución investiu 105.000 euros; o de Rioxoán, por Boel, Chao de Pousadoiro e Carballiño, a Asturias, con 540.000 euros; ou do o de Becerreá ata Louxa, de 1 millón de euros. Martínez adiantou que nos vindeiros días a institución iniciará as obras de mellora da CP-1904, con outros 200.000 euros, así como o remate das actuacións de rebacheo dos 133 quilómetros provincias que discorren pola Fonsagrada, con 300.000 euros.