Gómez Besteiro: 'O reto do modelo cooperativo pasa por unha xestión profesional e Alimentos Lácteos é un triste exemplo do contrario'
O ciclo de debates Galicia en clave económica, organizado pola Deputación de Lugo e Economía Digital, continuou este mércores co terceiro dos cinco encontros programados. Nesta ocasión, os expertos participantes Francisco Sineiro, profesor titular de Economía e Política Agraria na Escola Politécnica Superior de Lugo; Higinio Mougán, Director xerente de AGACA, e Eladio Rigueira, Director xeral de Casa Macán, analizaron a actualidade do sector agroalimentario galego e os seus principais retos de cara ó futuro á luz dos seus coñecementos e experiencia persoal.
Na intervención inaugural, o Presidente provincial alabou o modelo cooperativo por ser modelo de fortaleza, non só económica, senón tamén social. Gómez Besteiro destacou que as cooperativas, que xeran preto de 20.000 postos de traballo en Galicia o 1,78% da poboación ocupada-, engadindo que dende o inicio da crise socioeconómica en España produciuse unha lixeira redución no número de cooperativas pero incrementouse, pola contra, o seu número de traballadores. É un dato revelador que pon de manifesto que o cooperativismo é exemplo indiscutible da trascendencia da forza do traballo, da clave humana como factor de eficacia e eficiencia económica, así como de crecemento social e persoal, e subliñou o apego ó territorio das cooperativas galegas, o que as convirte en motores do desenvolvemento rural, un valor incalculable nun país como o noso, onde o 80% do rural está a producir
O máximo responsable provincial avogou por un cooperativismo que encare o seu futuro afrontando retos como a superación das barreiras dos mercados tradicionais; o aumento da produción ecolóxica, cuxo valor xa medrou un 4.000 por cento na última década, ou polo maior aproveitamento das novas tecnoloxías, poñendo como exemplo a plataforma de comercio electrónico Losproductosdelugo.com, posta en marcha polo organismo lugués. O que é innegable é que o reto do modelo cooperativo pasa por unha xestión profesional que aproveite as capacidades produtivas de xeito racional, subliñou.
A mala xestión de Alimentos Lácteos
Gómez Besteiro destacou a trascedencia dunha xestión eficaz da cooperativa, por que en caso contrario, calquera proxecto está destinado a morrer. Puxo como exemplo o peche de Alimentos Lácteos, ó que definiu como a crónica dunha morte anunciada, logo de que o Goberno de Núñez Feijóo desoira as voces, entre as que estaba as da propia Deputación de Lugo, que apostaban por poñer en marcha un proxecto que uniría a 24 cooperativas empregando a capacidade total de produción da planta. A gran unión do cooperativismo galego foi rexeitada unilateralmente pola Xunta de Galicia, que desaproveitou as oportunidades que ofrecía a fábrica leiteira máis moderna de Galicia; que supuxo o soterramento de 6 millóns de euros de cartos públicos e que afectou a máis de 1.000 familias. Desgraciadamente, non quixeron escoitarnos e agora serán os tribunais os que pronuncien a última palabra
As claves dos expertos
Os poñentes que formaron parte na mesa redonda coincidiron en destacar o peso das cooperativas no tecido económico galego. Francisco Sineiro fixo, ademais, fincapé no despilfarro que supón que dous tercios do total de superficie cultivable de Galicia estea desaproveitada, o que provoca graves limitacións na actividade económica e aumenta considerablemente os custes de mantemento
Pola súa banda, Higinio Mougán insistiu na necesidade de crear ferramentas para xestionar os prezos, e a necesidade de organizar o sector para facer fronte á volatilidade dos prezos e á globalización.
Eladio Rigueira presentou o seu proxecto, Casa Macán, e analizou dende a súa experiencia persoal, a situación do sector a nivel galego, nacional e internacional.
