Os xardíns da Deputación permanecerán pechados ó público ata o día 2 de xaneiro para levar a cabo tarefas de mantemento
Os xardíns do Pazo de San Marcos permanecerán pechados ó público ata o vindeiro xoves, día 2 de xaneiro, co fin de garantir a seguridade dos usuarios durante os labores de mantemento e poda que operarios do organismo provincial levarán a cabo estes días.
Aproveitando a menor afluencia de usuarios durante as datas de Nadal, técnicos e traballadores provinciais revisarán todas as árbores dos xardíns, moitas das cales son centenarias e de considerable tamaño, para proceder coas tarefas de poda necesarias, especialmente tras os fortes ventos rexistrados nas últimas semanas.
Os xardíns da Deputación foron abertos ó uso público no 2011, logo da súa rehabilitación dentro do Plan Urban, o programa europeo impulsado por Deputación e Concello de Lugo. A apertura da parcela e os xardíns situados na parte traseira do Pazo de San Marcos permitiu dar continuidade ó paseo interior da Muralla cun espazo duns 250 metros transitables. O Plan Urban incluíu outras actuacións que reactivaron a zona, como a peonalización da Praza de San Marcos que se convertiu, ademais, na primeira praza wifi da cidade.
A apertura dos xardíns provinciais evidenciou a falta de mantemento que viñan sufrindo dende había moito tempo, ata 15 anos no caso dalgúns exemplares como os magnolios.
