A Deputación descubriu os recursos turísticos da provincia a 5.000 estudantes cun Taller Escolar
Máis de 70 centros, de medio cento de concellos da provincia, levaron o turismo de proximidade ás aulas dos alumnos dos últimos cursos primaria e os primeiros da ESO
A institución provincial puxo en marcha esta acción que favoreceu o coñecemento dos alumnos e alumnas da súa contorna e, ao mesmo tempo, permite a promoción dun turismo sostible
O Presidente da Deputación, José Tomé Roca, xunto á Deputada de Réxime Interior, Promoción do Territorio e Turismo, Pilar García Porto, e á Alcaldesa de Lugo, Lara Méndez, acompañaron aos estudantes do I.E.S. lucense Áxel Fole, durante a última xornada do Taller Escolar de Turismo promovido pola institución provincial. Preto de 5.000 alumnos e alumnas de 4º, 5º e 6º de primaria e 1º e 2º da ESO de 74 centros da provincia participaron nesta iniciativa entre o 12 ao 16 de abril.
Os colexios e institutos, de case 50 concellos, inscritos nesta actividade achegaron aos seus estudantes ao turismo de proximidade durante cinco xornadas. Esta viaxe, que se realizou a través do libro Destino Lugo, ten como obxectivo favorecer o coñecemento por parte dos nenos e nenas da súa contorna e impulsar o turismo sostible. Tomé Roca destacou que “dende este goberno entendemos que promover o turismo de proximidade é un xeito de axudar á reactivación da economía da nosa provincia, pero tamén unha maneira de incentivar un lecer seguro en tempos de restricións de mobilidade”.
Pola súa banda, Lara Méndez subliñou a importancia do turismo de proximidade “pois representa unha gran oportunidade para redescubrir lugares que atesouran unha gran riqueza histórica, cultural e artística, ao tempo que promovemos tamén o afecto polo noso patrimonio dende a infancia, para que os máis pequenos crezan coñecendo as potencialidades coas que contamos, e que eles mesmos poidan converterse, logo, en divulgadores desa riqueza”.
Con esta actividade o alumnado descubriu a provincia a través dunha historia teatralizada na que un grupo de estudantes, acompañados dunha profesora e o mago Merlín, coñece os valores que se agochan en cada unha das comarcas lucenses. “Con esta proposta traballamos en dúas liñas: dunha banda, impulsando un turismo para toda a provincia que poña en valor a variedade dos destinos de Lugo e doutra, espertar o interese polo turismo entre o alumnado e o seu círculo familiar”, insistiu o Presidente.
