A Deputación inicia as obras de mellora da estrada provincial que une Sober e Doade
![](/sites/deputacionlugo.org/files/2021-06/210621%20LU-P-5903.jpeg)
Os traballos desenvólvense entre os puntos quilométricos 13 e 13,740, aos que se lle dará continuidade con outras obras que están en fase de licitación e que afectarán ao seguinte quilómetro
A Deputación de Lugo iniciou esta semana os traballos de mellora da estrada provincial LU-P-5903, que conecta o núcleo de Sober con Doade. Uns traballos nos que a institución provincial inviste preto de 100.000€ para renovar o treito comprendido entre os puntos quilométricos 13 e 13,740.
As obras consisten na ampliación da plataforma ata conseguir unha anchura de 5,5 metros. Para iso, realizaranse as tarefas de drenaxe, afirmado, aglomerado en quente e sinalización horizontal co obxectivo de reforzar a seguridade viaria e a comodidade dos usuarios e usuarias. O prazo de execución é de 9 meses, pero a previsión é que estean rematados nas vindeiras semanas, sempre que as condicións meteorolóxicas sexan favorables.
A estas obras daráselles continuidade coa execución de novas actuacións que a Deputación ten agora mesmo en fase de licitación por un importe de 130.705,23€. Trátase do treito que vai do quilómetro 13,740 ata o 14,480, unhas obras ás que a Xunta de Goberno lles deu o visto bo a pasada semana.
Con estas actuacións que comezaron en Sober, a Deputación continúa a mellorar a rede viaria provincial, favorecendo deste xeito a seguridade, o equilibrio territorial e a calidade de vida dos veciños e veciñas da provincia de Lugo.